सुर्खेत : सुर्खेतमा कोरोनाका सक्रिय संक्रमितको संख्या एक हजार बढी रहेको छ । प्रदेश स्वास्थ्य सेवा निर्देशनालयका अनुसार पछिल्लो समय कोरोना संक्रमणको जोखिम बढेसँगै संक्रमितको पनि संख्या बढेको हो ।
सुर्खेतमा कोरोनाका सक्रिय संक्रमितको संख्या एक हजार १५ रहेको छ । सबै भन्दा बढी वीरेन्द्रनगरमा ७६५ जना कोरोना सक्रिय संक्रमितको संख्या रहेको छ । यो संख्या अन्य पालिकाको तुलनामा ७५ प्रतिशत हो । यहाँ शहरी क्षेत्र बढी भएको र भिड बढी हुने भएकाले संक्रमितको संख्या बढी छ ।
वीरेन्द्रनगर नगरपालिकाका कोरोना फोकल पर्सन भुपेन्द्र गिरीले अहिले नगरपालिकामा कोरोना संक्रमण दर ५० प्रतिशत रहेको बताए । बिहीबार ९४ जनाको परीक्षण गर्दा ४८ जनामा संक्रमण पुष्टी भएको उनले बताए । यद्यपी यो अवस्था संक्रमण दरमा केही कमी आएको उनको भनाई छ । तर जोखिम कायमै भएकाले जनस्वास्थ्यका मापदण्ड अनिवार्य पालना गर्न उनले आग्रह गरे ।
यस्तै गुर्भाकोट नगरपालिकामा ८४, भेरीगंगा नगरपालिकामा ६५, लेकवेशी नगरपालिकामा ३८, पञ्चपुरी नगरपालिकामा २७, चिङ्गाड गाउँपालिकामा १९ र सिम्ता गाउँपालिकामा १२ जना सक्रिय संक्रमित रहेका छन् ।
कोरोना संक्रमणको तेस्रो लहर आएसँगै कोरोना संक्रमणको दर बढेको छ । सुर्खेतमा कोरोना संक्रमणको जोखिम बढे पछि जनस्वास्थ्यका मापदण्ड पालना गर्न स्थानीय प्रशासनले समेत आग्रह गरेको छ ।
