काठमाण्डौं : नेपालको प्राकृतिक सम्पदाभित्र पर्ने वन क्षेत्रलाई पनि पर्यापर्यटनमा समेट्न आग्रह गरिएको छ। नेपाल पर्यटन बोर्ड र वन तथा भूसंरक्षण विभागको आयोजनामा पर्यापर्यटनसँग सरोकार राख्ने सरोकारवालाहरुसँग दिगो पर्यटन विकासका लागि पर्यापर्यटनसम्बन्धी छलफल कार्यक्रममा पर्यटन बोर्डको प्रमुख कार्यकारी अधिकृत डा।धनन्जय रेग्मीले उक्त आग्रह गरेका हुन्।
उनले नेपालको प्राकृतिक सम्पदा पर्यटनका लागि महत्वपूर्ण भएकाले वन क्षेत्र पनि पर्यापर्यटनमा समेटिनु पर्ने बताएका छन्। उनले भने, ‘वनले आर्थिक उपार्जन तथा रोजगारी सिर्जनाका थुप्रै काम गर्न सक्छ। यसको उपयोग गर्दै पर्यापर्यटन अगाडि बढाउन जरुरी छ। तर यस क्षेत्रमा पर्याप्त काम हुन सकेको छैन्। बोर्डले यसको प्रवद्र्धनात्मक कार्यमा सघाउने छ।’
कार्यक्रममा बोर्डका वरिष्ठ निर्देशक हिक्मतसिंह ऐरले नेपाल पर्यटन बोर्डले सन् १९९९ देखि नै दिगो पर्यटनका क्षेत्रमा विभिन्न काम गर्दै आईरहेको जानकारी दिँदै दिगो पर्यटन युनिटको अवधारणा सातै प्रदेशमा लैजानु पर्ने बताए। उनले यसको लागि वन तथा भूसंरक्षण विभाग, बोर्ड, विभिन्न सामुदायिक वन उपभोक्ता महासंघ तथा निजी क्षेत्रको सहकार्य आवश्यक भएको बताए।
वन तथा भूसंरक्षण विभाग अन्र्तगत सामुदायिक वन अध्ययन केन्द्रका सहायक वन अधिकृत विष्णु ज्ञवालीले वनसँग मिलेर पर्यटनका थुप्रै गतिविधि गर्न सकिने जानकारी दिंदै विभागले बोर्ड तथा अन्य सरोकारवालासँग समन्वय गरेर अघि बढ्न चाहेको बताए। उनले वनसँग सम्बन्धित कतिपय नीति नियमहरु कठिन भएपनि त्यसलाई सहज बनाउँदै वनलाई आर्थिक विकास, रोजगारी सर्जिना र उद्यमशीलतासँग जोडने गरी काम भएको बताए।
कार्यक्रममा पर्यटन व्यवसायी मेघ आले, डीबी चौधरी, ठाकुर देवकोटा, केशव प्रसाद दाहाललगायतले स्थानीय तहमा काम गर्दा तीन तहका कानून बाझिने तथा नीतिगत झण्झटले काम गर्न असजिलो भएको भन्दै सहजीकरणको माग गरका थिए। साथै, पर्यापर्यटनको विकासको लागि प्राकृतिक सम्पदाहरुको संरक्षणमा राज्यको ध्यान जानु पर्ने बताए।
कार्यक्रममा प्रदेशस्तरमा गठन भएका वन उद्यम तथा पर्यापर्यटन सञ्जालहरू, दीगो पर्यटन सञ्जालका सदस्य तथा विज्ञहहरूको सहभागिता रहेको थियो।
