जुम्ला : अखण्ड मध्यपश्चिमको माग राखि ५ बर्ष अघि भएको आन्दोलनमा साहदत प्राप्त जुम्लाका हरिबहादुर कुँवरको सालिक निर्माण गरिएको छ । सालिक निर्माण पछि उक्त सालिक राख्ने ठाँउको टुंगो भने अझै लागेको छैन । स्मृति दिवसमा सालिक स्थापना गर्ने भनिए पनि स्थान टुंगो नलाग्दा सालिक ठड्याउन नसकिएको स्थानीयले बताए ।
२०७२ साल भदौ ६ गते बलिदानी गरेका कुँवरको सम्झनामा सदरमुकाममा सालिक राख्ने निर्णय राजनैतिकदलहरुले कार्यान्वयन गर्न नसक्दा सालिक राख्न नसकिएको स्थानीयको भनाई छ ।
उनले ज्यान बलिदान गरेको स्थान जिल्ला प्रशासन कार्यालयको पेरिफेरिमा राख्दा उचित हुने निश्कर्षमा राजनैतिक दलहरु पुगेपछि साविक घरेलु तथा साना उद्योग विकास समितिको उत्तरतिरको भागमा सालिका राख्ने निर्णय भएको थियो । तर अहिले नयाँ भवन लगाएर सालिक राख्ने स्थान समेत नभएपछि अन्यौल भएको छ ।
शहीद हरिबहादुर कुँवरका दाजु तथा हरिबहादुर कुँवर कर्णाली स्मृति प्रतिष्ठानका अध्यक्ष राजबहादुर कुँवरले सालिक बनिसकेको तर राख्ने जग्गा समेत नहुनु बिडम्बना रहेको बताए । उनले दलहरुले गरेको निर्णय कार्यान्वयन गरिनुपर्नेमा जोड दिए । सालिक निर्माणका लागि भने चन्दननाथ नगरपालिका, हिमा गाउँपालिका, तिला गाउँपालिका, तातोपानी गाउँपालिका, गुठीचौर र पातारासी गाउँपालिकाको आर्थिक सहयोगमा रु १३ लाखमा सालिक निर्माण भएको छ ।
भदौ ४ गते कर्णाली प्रदेश सरकारले सहिद स्मृती दिवस भनेर सो आन्दोलनमा साहदत प्राप्त गर्ने कर्णालीका ४ सहिदको सम्झनामा स्मृति दिवस पनि मनाउने गरेको छ । तत्कालिन समयमा कर्णालीलाई छुट्टै प्रदेश बनाउनुपर्ने माग सहित भएको आन्दोलनमा सुर्खेतका यामबहादुर वि.सी, टिकाराम गौतम, गोपाल रजवार र जुम्लाका कुँवरको प्रहरीको गोली लागी मृत्यु भएको थियो । कोरपाटी डटकम
