नेपालगञ्ज : बाँकेमा कोरोना सङ्क्रमणबाट गए राति थप एक जनाको मृत्यु भएको छ । फोक्सोमा निमोनिया भएपछि शिक्षण अस्पताल नेपालगञ्जमा भर्ना भएका नेपालगञ्ज उपमहानगरपालिका वडा नं ५ निवासी ६२ वर्षीय पुरुषको गए राति मृत्यु भएको स्वास्थ्य कार्यालय बाँकेका कोरोना स्रोतव्यक्ति नरेश श्रेष्ठले जानकारी दिए ।
उनका अनुसार गए राति ११ : ४० बजे उपचारकै क्रममा उनको मृत्यु भएको हो । उनलाई साउन ३० गतेदेखि कोरोनाको लक्षण देखिएपछि ३२ गते शिक्षण अस्पताल नेपालगञ्जमा भर्ना गरिएको थियो ।
भेरी अस्पताल नेपालगञ्जमा गरिएको कोरोना परीक्षणमा उनको सोमबार दिउँसो पोजेटिभ रिपोर्ट आएको थियो । मृतकको घरपरिवार र नेपाली सेनासँगको समन्वयमा शव व्यवस्थापनको तयारी भइरहेको प्रमुख जिल्ला अधिकारी रामबहादुर कुरुम्वाङले जानकारी दिए ।
बाँकेमा कोरोना सङ्क्रमणबाट ज्यान गुमाउनेको सङ्ख्या चार पुगेको छ । यसअघि नरैनापुर, बैजनाथ र कोहलपुरका तीन जनाको कोरोना सङ्क्रमणबाट मृत्यु भएको थियो ।
यसैवीच, नेपालमा कोरोनाबाट मृत्यु हुनेको संख्या १ सय १३ पुगेको छ । पोखरामा ८७ वर्षीय वृद्धको पोखरा स्वास्थ्य विज्ञान प्रतिष्ठानमा तनहुँ जिल्लाकी ५० वर्षीय महिलाको कास्की सेवा अस्पतालमा, धुलिखेल नगरपालिका–७ घर भएका ९८ वर्षीय वृद्धको धुलिखेल अस्पतालमा र पाटन अस्पताल ललितपुरमा आज विहान एक जना ३८ वर्षका कोरोना संक्रमित पुरुष गरी थप ४ जना कोरोना संक्रमितको मृत्यु भएको छ।
यो सहित नेपालमा कोरोना संक्रमणबाट मृत्यु हुनेको संख्या ११३ पुगेको हो ।
