सुर्खेत : आज भन्दा पाँच वर्ष अगाडि भएको अखण्ड मध्यपश्चिमको आन्दोलनमा आजकै दिन शहादत प्राप्त गरेका शहिदको सम्झनामा वृक्षारोपण गरिएको छ ।
शहिद याम बिसी स्मृति प्रतिष्ठानको आयोजनामा देउती बज्यै सामुदायिक वनको चौखेढुङ्गामा भएको वृक्षारोपणमा शहिद याम बहादुर बिसीका बुबा शेरबहादुर बुढाले बर र आमा बाली बुढाले पिपल रोपेका हुन् ।
शहिदको सम्झनामा वृक्षारोपण गरिएको र उनीहरुको आत्मले शान्ति पाओस् भन्ने कामना गरिएको शहिद याम बहादुर बिसीका बुबा शेर बहादुर बुढाले बताए । आफ्नो छोराले प्रदेश स्थापनाका लागि ज्यान दिएपनि सरोकारवालाहरुले खासै उनीहरुको सम्मान चासो नदेखाएकोले निकै दुःख लागेको बुढाको भनाई थियो ।
वृक्षारोपण स्थलमा बोल्दै वीरेन्द्रनगर नगरपालिका वडा नं. ११ का वडाअध्यक्ष नन्दलाल शर्माले भने, ‘शहिदले रगत बगाएर प्रदेशको स्थापना गरेका छन् यसलाई समृद्ध बनाउनका लागि सबै लाग्नु पर्दछ । जसले गर्दा शहिदका सपना पूरा हुन्छन् ।’ केवल वर्षको एकदिन यसो गर्छौ भनेर केही नहुने भएकोले प्रभावकारी हुने काम गर्नुपर्ने उनको भनाई थियो । तत्कालिन समयमा गरिएका निर्णयहरु कार्यान्वयन गर्न कञ्जुस्याँईं गर्न नहुने वडाअध्यक्ष शर्माले बताए ।
२०७२ सालमा देशमा संघीयताको सिमाङ्कन भएसँगै साविकको मध्यपश्चिमलाई सुदुरपश्चिममा गाभ्ने गरि भएको निर्णयको विरुद्धमा स्वस्फूर्त रुपमा आन्दोलन भएको थियो । उक्त आन्दोलन चर्किदै जाने क्रममा आजकै दिन (अर्थात साउन २५ गते) सुर्खेतमा यामबहादुर बिसी, टीकाराम गौतम र गोपाल सिं रजवारको ज्यान गएको थियो । यसैगरि जुम्लामा भएको आन्दोलनमा हरिबहादुर कुँवरको ज्यान गएको थियो । नेपाल सरकारले उनीहरुलाई शहिद घोषणा गरेको छ । आन्दोलन पश्चात सरकारले ६ नं. प्रदेशको घोषणा गर्न बाध्य भएको थियो ।
वृक्षारोपणमा देउती बज्यै सामुदायिक वन उपभोक्ता समूहका अध्यक्ष दीपा शर्मा, कोषाध्यक्ष जसवीर सुनार, याम विसी स्मृति प्रतिष्ठान कार्यसमितिका पदाधिकारी एवम् सदस्यहरु, स्थानीय वन उपभोक्ताहरुको उपस्थिति रहेको प्रतिष्ठानका सचिव भगवती विसीले बताइन् ।
