बुटवल : प्रदेश ५ प्रदेशसभाका लागि प्रमुख प्रतिपक्षी दल नेपाली काँग्रेसको संसदीय दलको नेतामा बीरेन्द्रकुमार कनौडिया चयन भएका छन् ।
मंगलबार बुटवलमा बसेको पार्टी संसदीय दलको बैठकले कनौडीयालाई दलको नेता चयन गरेको हो । उनी कपिलवस्तु ३ (ख) बाट निर्वाचित भएका थिए ।
कनौडियालाई पार्टी संसदीय दलको नेतामा प्रमुख सचेतक सुरेन्द्र हमालले प्रस्ताव र लेखा समितिका सभापति समेत रहेका सांसद डिल्ली चौधरीले समर्थन गरेका थिए ।
गत माघ ८ गते संसदीय दलका नेता बलदेव शर्मा पोखरेलको क्यान्सरका कारण मृत्यु भएपछि उनी कार्यबाहक नेता बनेका थिए । उनले अव संसदमा प्रखर रुपमा प्रस्तुत हुने र सरकारका गलत कामको विरोधमा खरो उत्रने बताए ।
