कालिकोट : हाडजोर्नी विशेषज्ञ डा. गोविन्द केसी कालीकोटमा हाडजोर्नी समस्या बढी भएको थाहा पाएर शिविर चलाउन मान्मा पुगेका छन् । बाजुरा, अछाम हुँदै एक साताअघि कालीकोट पुगेका केसीले कालिकोटमा विपन्न जनताका लागि शिविर सञ्चालन गरेका हुन् ।
अहिलेसम्म २६ महिला र १८ पुरुष गरी ४४ जनाको निःशुल्क स्वास्थ्य परीक्षण गरिसकेका छन् । उनी आएको थाहा पाएपछि गाउँ–गाउँबाट उपचार गराउन आउने बिरामीको घुँइचो लागेको छ ।
अस्पतालका सिनियर अहेव जगदीश नेपालीका अनुसार शिविरमार्फत १३ जनाको हड्डी लाटो बनाएर जोर्नी मिलाइएको छ भने ६ जनाको बेहोस नबनाएर प्लास्टर गरिएको छ । ‘उहाँ आएको थाहा पाएर उपचार गराउन टाढा–टाढाबाट बिरामी आएका छन्,’ उनले भने, ‘आर्थिक अवस्था कमजोर भएर वर्षौंदेखि उपचार नपाएका बिरामीले जिल्लामै भरपर्दो उपचार सेवा पाएका छन् ।’ परीक्षण गरेका बिरामीलाई निःशुल्क औषधि वितरण गरिएको उनले जानकारी दिए ।
