काठमाण्डौं : सोफिया थापाले ल्याएको ‘अबको तीज नो व्रत प्लिज’ शीर्षकको गीत युट्युब च्यानलबाट हटाइएको छ । गीतलाई धार्मिक संस्थाले प्रतिबन्ध गर्न दबाब दिएपछि युट्युबमा प्राइभेट गरिएको भिडियो अपलोडर हाइलाइट्स नेपालले जनाएको छ ।
तिज पर्वको मान्यता, पररम्परा र भावनाविरुद्धको गीत ल्याइएको भन्दै हिन्दु जागरण संस्था त्यसको विरूद्धमा उत्रिएको थियो ।
विभिन्न सञ्चार माध्यमका साथै सामाजिक सञ्जालमा गीतका पक्ष र विपक्षमा विचार व्यक्त भएका थिए । गायिका थापाले सोमबार सार्वजनिक गरेको आफ्नो गीतलाई लिएर धम्की आएको भन्दै मंगलबार प्रहरीमा उजुरी दिएकी थिइन् । ‘यसपालीको तिज, नो व्रत प्लिज’ सार्वजनिकपछि विभिन्न व्यक्तिबाट आफूलाई फोन र म्यासेजमा धम्की आइरहेको थापाले बताइन् ।
गीत युट्युबमा सार्वजनिक भएलगत्तै चर्को प्रतिक्रिया सामना गर्नुपरेको हो । उनले गीत नहटाएमा भौतिक आक्रमण गर्ने चेतावनी आएपछि काठमाडौं र बुटबलबाट प्रहरीमा लिखित उजुरी दिएको जानकारी दिइन् । उनले भनिन्, ‘गीत अपलोड भएदेखि नै मलाई लगातार चेतावनी र धम्की आइरहेको छ । हिन्दूवादीहरु संगठितरुपमा नै ममाथि खनिएका छन् ।
मैले आफ्नो ज्यानको सुरक्षा गरिपाउँ भन्दै उजुरी दिएको छु ।’ सोफियाकै शब्द तथा संगीत रहेको उक्त गीतले तिजको मर्म र हिन्दू महिलाको आस्थामा ठेस पु¥याएको भन्दै विवाद भएको छ । गायिका सोफियाले आफूले गीतमार्फत समाजमा लैंगिक चेतना जगाउने उद्देश्य राखेर व्रत नबस्न आग्रह गर्दै गीत गाएको जिकिर गरिन् । हाइलाइट्स नेपालको च्यानलबाट युट्युबमा सार्वजनिक भएको गीतमा तिजको व्रत नबस्न महिलालाई आह्वान गरिएको छ ।
यसैबीच विश्व हिन्दू युवा संघ अन्तर्राष्ट्रिय समितिले यो गीत युट्युबबाट हटाउन आग्रह गरेको छ । समितिका नाममा सोमबार प्रकाशित विज्ञप्तिमा मंगलबारसम्म गीत नहटाए विरोधका कार्यक्रम सञ्चालन गर्ने उल्लेख गरिएको छ । गायिका सोफियाले भने आफूले कुनै गल्ती नगरेकाले कसैको दबाबमा गीत नहटाउने बताइन् ।
