सुर्खेत : आज नेपालका पहिलो जननिर्वाचित प्रधानमन्त्री तथा नेपाली काँग्रेसका संस्थापक नेता विश्वेश्वरप्रसाद कोइराला (बीपि) को ३८ औं स्मृति दिवस मनाइदैछ ।
बीपि स्मृति दिवसका अवसरमा नेपाली काँग्रेस र उसका भातृ संगठनले देशभर विभिन्न कार्यक्रमको आयोजना गर्दैछन् ।
नेपाली काँग्रेस सुर्खेतले पनि आज उपत्यकाकाको सुब्बाकुनामा बृक्षारोपण कार्यक्रम सम्पन्न गरेको छ । बृक्षारोपण सहित पार्टी कार्यालयमा एक कार्यक्रम आयोजना गरी सुर्खेत काँग्रेसले विपीको स्मरण गर्दै समाजबादको चर्चा गरेको हो ।
वृक्षारोपण कार्यक्रमलाई सम्वोधन गर्दै नेपाली काँग्रेसका जिल्ला सभापति कमलराज रेग्मीले अहिले देशमा विपीको विचार अत्यावश्यक भएको बताए । ‘अहिले देशमा जहाँतहाँ विवाद नै विवाद देखिने गरेको छ । यी विवादलाई समाधान गर्न विपिको मेलमिलाप नीति अंगिकार गर्नुपर्ने बेला आएको छ ।’ उनले भने, ‘विपी महान विचारक हुन । उनको समाजवाद देशमा लागु गर्न आवश्यक छ । उक्त समाजवाद लागु गरेको खण्डमा मात्रै नेपालको भविष्य उज्जववल छ ।’
कार्यक्रमलाई सम्वोधन गर्दै जिल्ला समन्वय समिति सुर्खेतका संयोजक छविलाल सिग्देलले विपीको महान विचारबाट काँग्रेस मात्रै नभई अरुले पनि पाठ सिक्नुपर्ने बताए । कार्यक्रममा जिल्ला कार्यसमितिका पदाधिकारीहरु, कार्यकर्ताहरुको सहभागिता रहेको थियो ।
यस्तै, नेपाल विद्यार्थी संघ केन्द्रीय समितिले बीपि संग्रहालय सुन्दरीजल क्षेत्रमा वृक्षारोपण कार्यक्रम राखेको छ । विभिन्न जिल्लामा पनि काँग्रेस तथा यसका भातृ संगठनले विभिन्न कार्यक्रम गरी बीपिलाई सम्झदैछन् ।
कोइराला २०१५ सालको आमचुनावमा कांग्रेसले दुई तिहाइ बहुमत ल्याएपछि पहिलो जननिर्वाचित प्रधानमन्त्री बनेका थिए । उनले नेपालमा राष्ट्रियता, प्रजातन्त्र र समाजवाद स्थापनाका लागि राजनीतिक नेतृत्व दिए ।
तर दुई वर्ष काम गर्न नपाउँदै तत्कालीन राजा महेन्द्रले जननिर्वाचित संसद् अपदस्त गरेपछि उनले लामो समय निर्वासन र जेलमा बिताउनुपरेको थियो ।
पछि उनी विदेशमा बसेर देशका लागि लड्नुभन्दा देशभित्रकै सबै शक्तिबीचको एकता महत्वपूर्ण हुने भन्दै राष्ट्रिय मेलमिलापको नीति लिएर स्वदेश फर्किएका थिए ।
उनले अभ्यास गरेको प्रजातान्त्रिक समाजवाद र मेलमिलापको नीति अहिले पनि सान्दर्भिक मानिन्छ । कोइरालाको २०३९ साउन ६ गते निधन भएको थियो ।
