सुर्खेत : कर्णाली प्रदेशमा आज सात जना कोरोना संक्रमित थपिएका छन् । सामाजिक विकास मन्त्रालयका अनुसार दैलेखका पाँच जना, सल्यान र रुकुमपश्चिमका एक÷एक जना संक्रमित थपिएको हुन् । योसँगै कर्णालीमा कोरोना संक्रमितको संख्या एक हजार सात सय ३३ जना पुगेको छ ।
पछिल्लो २४ घण्टामा सुर्खेतको पशुपन्छी रोग अन्वेषण प्रयोगशालामा गरिएका परीक्षणमध्ये दैलेखको चामुन्डाविन्द्रासैनी नगरपालिका वडा नं. ३ का एक जना र दैलेख अस्पतालमा गरिएको परीक्षण नौमूले गाउँपालिका वडा नं. ५ र ६ का एक/एक जना र आठविस नगरपालिका वडा नं. २ का दुइ जना संक्रमण पुष्टि भएको हो ।
त्यस्तै चौरजहारी नगरपालिकाको पीसीआर प्रयोगशालामा परीक्षण गरिएकामध्ये सल्यानको दार्मा गाउँपालिका वडा नं. ५ र रुकुमपश्चिमको चौरजहारी नगरपालिका वडा नं. ७ का एक/एक जना पनि संक्रमण पुष्टि भएको छ ।
त्यस्तै आज नै प्रदेश अस्पताल सुर्खेतबाट दुइ जना र जाजरकोटका शिवालय आइसोलेसनबाट तीन जना गरी कुल पाँच जना डिस्चार्ज भएका छन् । योसँगै कर्णालीमा डिस्चार्ज हुनेको संख्या एक हजार चार सय ९३ जना पुगेको मन्त्रालयका स्वास्थ्य सेवा महाशाखा प्रमुख डाक्टर लक्ष्मीनारायण तिवारीले जानकारी दिए ।
