एजेन्सी : पोर्चुगिज स्टार क्रिस्टियानो रोनाल्डोले सिरी ए अन्तर्गत शनिबारको खेलमा टोरिनोविरुद्ध फ्रिकिकमा सिधै गोल गर्दै दुई वर्षदेखि चलिरहेको फ्रिकिक गोलको खडेरी तोडेका छन् ।
युभेन्टसले लिगको शीर्षस्थानमा अग्रता बढाउने क्रममा ४(१ को जित दर्ता गरेको थियो । दोस्रो हाफमा रोनाल्डोको फ्रिकिक गोलसँगै युभेन्टस ३-१ ले अगाडी बढ्दै जिततर्फ अग्रसर रहेको थियो । खेलपछि पत्रकारसँग बोल्ने क्रममा रोनाल्डोले फ्रिकिक गोलसँगै मनोबल झनै बढेको बताएका छन् ।
‘मलाई त्यो फ्रिकिक गोल जसरि पनि गर्नु थियो । मेरो मनोबल बढाउनकै लागि पनि फ्रिकिकमा गोल गर्न चाहन्थें,’ रोनाल्डोले भने, ‘ हामीलाई थाहा थियो खेल सहज हुने छैन । हामीले पूरा समय मिहिनेत गर्यौं र उपाधि होडमा थप बलियो स्थान बनायौं ।’
रोनाल्डोले टोलीको जितका लागि जसले गोल गरेपनि फरक नपर्ने प्रष्ट पारे । ‘ गोल कसले गर्यो त्यो मतलब हुँदैन, मात्र टोलीको जित पक्का हुनुपर्यो । हामी सबै उच्च लयमा छौं । अबको ध्यान मिलानविरुद्ध खेलमा हुनेछ । त्यो खेल पक्कै सहज हुने छैन,’ रोनाल्डोले थपे ।
रोनाल्डोको फ्रिकिक गोलले प्रशिक्षक माउरिजियो सार्रीलाई पनि थप खुसी दिएको छ । सार्रीले खेलपछि बोल्ने क्रममा रोनाल्डोले फ्रिकिकमा गोल गर्न नसक्दा उनलाई कति असर परेको भन्ने यकिन गर्न नसकेको बताए ।
‘मलाई कहिल्यै पनि लागेन की फ्रिकिकमा गोल नहुनु समस्या थियो । तर खेल सकिएपछि उनी मकहाँ आए र भने, अन्त्यमा गोल भयो,’ सार्रीले थपे, ‘ मलाई थाहा थिएन उनको खेलमा यति असर परेको थियो भन्ने ।’
सार्रीले रोनाल्डोसँगै डिबालाको भूमिकाको पनि खुलेर प्रशंसा गरे । ‘मलाई डिबालामाथि कहिले पनि शंका थिएन । यो साँचो हो की गत सिजन उनले अपेक्षा गरेअनुसार प्रदर्शन गर्न सकेनन् । तर त्यसअघि उनले गोल गरेका थिए । पछिल्लो सिजन उनको दुर्भाग्य नै मान्नुपर्छ,’ सार्रीले भने । हाम्रो खेलकुद डटकमबाट
