सुर्खेत : कर्णालीमा आइतबार थप ९ जना कोरोना संक्रमणका विरामी फेला परेका छन् । सामाजिक विकास मन्त्रालय कर्णाली प्रदेशको स्वास्थ्य सेवा महाशाखाले जारी गरेको विज्ञप्ति अनुसार दैलेखका ५, सुर्खेतका १, सुर्खेतमा रही अन्यत्र घर भएका २ र सल्यानका १ जनामा कोरोना पुष्टि भएको हो ।
यो संगै कर्णालीमा हाल सम्म कोरोना संक्रमण संख्या १ हजार ४ सय ९८ पुगेको छ । त्यस मध्य सक्रिय विरामीको संख्या २ सय ६१ जना मात्र रहेको महाशाखाले जनाएको छ । कुल विरामी मध्य हाल सम्म १ हजार २ सय ३१ जना निको भई डिस्चार्ज भइसकेका छन् भने ६ जनाको ज्यान गएको छ ।
आज मात्रै सुर्खेतबाट २३ जना (प्रदेश अस्पतालबाट १३, लेकवेसी आइशोलेसन केन्द्रबाट ४ जना, मेहेलकुना अस्पतालबाट ३ जना र गुर्भाकोट आइशोलेसनबाट ३ जना), सल्यान अस्पतालबाट ५ जना र कालिकोट अस्पतालबाट २ जना गरी ३० जना कोरोनामुक्त भई डिस्चार्ज भएका छन् ।
