एजेन्सी : इंग्लिस क्लब म्यान्चेस्टर युनाइटेडका मिडफिल्डरद्वय पल पोग्बा र ब्रुनो फर्नन्डेस प्रशिक्षणका क्रममा एक अर्कासँग जुध्न पुग्दा दुवै घाइते भएका छन् ।
इंग्लिस संचारमाध्यम मिररका अनुसार प्रशिक्षक ओले गनर सोल्साएरले दिएको अभ्यास गर्ने क्रममा पोग्बा ब्रुनोसँग जुध्न पुगेका थिए । दुवैले एक अर्कालाई नदेखेको अवस्थामा पोग्बा ब्रुनोसँग ठोक्किएका थिए । दुईमध्य ब्रुनोलाई बढी चोट लागेपछि उनी प्रशिक्षण छाडेर उपचारका लागि गएका थिए । पोग्बा पनि सामान्य घाइते भएका छन् ।
दुवै खेलाडीले बर्नमाउथविरुद्धको खेल गुमाउने सम्भावना बलियो रहेको छ । शनिबार हुने खेलको तयारीका लागि शुक्रबार प्रशिक्षणमा दुई मुख्य खेलाडी घाइते भएपछि युनाइटेडलाई समस्या परेको छ । कोरोनापछि सुचारु भएको लिगमा पोग्बा र ब्रुनोको जोडीले उत्कृष्ट प्रदर्शन गर्दै आएको छ ।
युनाइटेडले आधिकारिक रुपमा यसको पुष्टि भने गरेको छैन । तर शनिबार हुने खेलका लागि भने दुवै खेलाडी उपस्थित नहुने प्रबल सम्भावना छ । युनाइटेडले बर्नमाउथलाई पराजित गरेमा अंक तालिकामा चेल्सीभन्दा माथि उक्लनेछ । युनाइटेडले एफए कप र युरोपा लिगमा पनि खेलिरहेको छ ।
