जुम्ला : सिँजा गाउँपालिकाले नराकोटमा केन्द्र राख्ने सहमतीका साथ केन्द्र को विवाद टुङ्ग्याएको छ । जुम्लाका आठै स्थानीय तहमध्ये सबैभन्दा पहिले यहाँको सिंँजा गाउँपालिकाले गाँउसभाबाट केन्द्र टुङ्ग्याएको हो ।
सिँजा नराकोटमा गाउँपालिकाको केन्द्र निर्धारण गर्ने निर्णय गाउँसभाबाट सर्वसम्मत पारित भएको गाउँपालिकाका अध्यक्ष देवलसिंह रावलले बताए ।
गाउँपालिकाको भवन बनाउनका लागि दुई हजार तीन सय वर्गमिटर क्षेत्रफल जग्गा प्राप्त भएको छ । गाउँपालिकाको प्रशासकीय भवन बनाउनका लागि गत वर्ष गाउँपालिका र प्रदेश सरकारबाट रु ७०–७० लाख विनियोजन भएको थियो ।
यस वर्ष प्रदेशबाट आउने रकम र गाउँसभाबाट विनियोजित बजेटमा छलफल गरेपछि मात्र रकम विनियोजन गरिने अध्यक्ष रावलले बताए । पालिकाको भवनको लागत रु ६ करोड हुने भएको छ । उक्त रकम पनि नपुगे प्रदेश वा केन्द्र सरकारसँग पहल गरिने गाउँपालिकाले जनाएको छ । रासस
