सुर्खेत : आज १७ औ राष्ट्रिय धान दिवस एवं रोपाँई दिवस । कर्णाली सरकारले आज यो प्रदेशका जुम्ला बाहेकका जिल्लामा सार्वजनिक विदा समेत दिएको छ ।
धान दिवस मनाउँदै गर्दा खाद्यान्न अभाव हुने प्रदेशका रुपमा चिनिएको कर्णाली प्रदेशमा आज सम्म ३९ प्रतिशत् धान रोपाँई सम्पन्न भएको छ । भुमि ब्यवस्था, कृषि तथा सहकारी मन्त्रालयले दिएको जानकारी अनुसार समयमैं मनसुन शुरु भएको बेलामा पनि कर्णालीमा ३९ प्रतिशत् क्षेत्रमा रोपाँई सम्पन्न भएको हो ।
जुम्लामा चैत महिनामै धान रोपाइँ हुँदै आएको छ । जसका कारण प्रदेश सरकारले हरेक वर्ष जुम्लामा चैत १२ गते सार्वजनिक बिदा दिने गर्दछ ।
कर्णालीको धान उत्पादनमा जम्मा ४९ हजार ४ सय २५ हेक्टर मध्ये हाल सम्म १९ हजार २ सय ४२ हेक्टरमा ३९ प्रतिशत धान रोपाइ सकिएको हो ।
सबै भन्दा धेरै डोल्पा जिल्लामा २ सय ७६ हेक्टर क्षेत्रफलमा शतप्रतिशत र जुम्ला जिल्लामा २ हजार ८ सय हेक्टर क्षेत्रफल मध्ये ९७ प्रतिशत अर्थात २ हजार ७ सय १६ हेक्टरमा धान रोपाइ सकिएको छ ।
कर्णालीका अन्य जिल्लाहरु दैलेख, रुकुम पश्चिम, जाजरकोट, सल्यानका अधिकांश स्थानमा धान रोपाँई सम्पन्न भइसकेको छ भने सुर्खेतमा धान रोपाँई कार्य उपत्यकामा शुरु भएको छ । सुर्खेतका ग्रामिण क्षेत्रका ३० प्रतिशत् खेतमा धान रोपाँई सकिएको छ ।
यसैविच, कर्णाली प्रदेश सरकारका प्रवक्ता एव भुमि ब्यवस्था, कृषि तथा सहकारी विमला केसीले दिवसका अवसरमा सवै किसानलाई शुभकामना दिएकी छन् ।
सत्रौँ राष्ट्रिय धान दिवस तथा रोपाइ महोत्सव २०७७ लाई सभ्य, भव्य र उल्लासपूर्वक मनाई कर्णालीमा धान संस्कृतिको जगेर्नामा हातेमालो गर्न आव्हन गर्दै उनले यस अवसरमा कर्णालीवासी आम नागरिक तथा कृषक दाजुभाइ दिदीबहिनीमा शुभकामना व्यक्त गरेको कुरा शुभकामना सन्देशमा उल्लेख छ ।
विश्वब्यापी महामारीको रुपमा फैलिएको कोभिड–१९ संक्रमणबाट सुरक्षित रही, सामाजिक दुरी कायम गर्दै धान दिवस तथा रोपाई महोत्सवमा सहभागी हुन,नेपाल सरकारको निर्णय बमोजिम बढिमा २५ जनासम्म मात्र भेला भएर १७ औ राष्ट्रिय धान दिवस तथा रोपाई महोत्सव मनाउने, यदि २५ जना भन्दा बढि भएमा न्युनतम सामाजिक दुरी (६ फिट) कायम हुने गरि स –साना उपसमुहमा रहेर रोपाइ महोत्सव मनाउन समेत मन्त्री के.सी.ले अपिल गरेकी छन् ।
विसं २०६१ मा विश्वका ४३ राष्ट्रले संयुक्त राष्ट्रसङ्घलाई अन्तर्रा्ष्ट्रिय धान वर्ष घोषणा गर्न अनुरोध गरे अनुसार राष्ट्रसङ्घले धान वर्ष घोषणा गरेपछि नेपालले पनि राष्ट्रिय धान दिवस मनाउने निर्णय गरेको थियो । विसं २०६१ मङ्सिर २९ गते मन्त्रिस्तरीय निर्णय गरी विसं २०६२ असार १५ गतेदेखि धान दिवसलाई राष्ट्रिय रुपमा मनाउन थालिएको हो ।
धानबालीका विभिन्न पक्षलाई उजागर गर्दै यस वर्ष ‘धान उत्पादनमा बृद्धि–आत्मनिर्भरता र समृद्धि’ भन्ने मूल नाराका साथ धानलाई राष्ट्रिय अर्थतन्त्रको आधारस्तम्भ रुपमा चिनाउन विभिन्न सरोकारवालाको समन्वय तथा सहकार्यमा सत्रौ राष्ट्रिय धान दिवस तथा रोपाइँ महोत्सव, २०७७ मनाइँदैछ । यही अवसरमा कर्णाली प्रदेश सरकारले आज सार्वजनिक विदा समेत दिएको छ ।
