दैलेख : कोरोनाको हट स्पट भनेर चिनिएको दैलेखमा कोरोना संक्रमण परिक्षण गर्ने आरटी पिसिआर मेशीन खरिद गरिएको छ । नारायण नगरपालिकाको पहलमा प्रतिनिधि सभा सांसदले खर्च गर्न पाउने निर्वाचन क्षेत्र विकास कार्यक्रम मार्फत मेशीन खरिद गरिएको हो ।
कर्णालीका सुर्खेत र जुम्लामा मात्र पिसिआर मेशीन हुँदा स्वाव संकलन गरी रिपोर्ट आइपुग्न समय लाग्ने र भारतबाट आउने नागरिकको संख्या दिन दिनै बरिरहेको अवस्थामा मेशीन आएपछि ठुलो राहत पुग्ने स्थानीयले बताएका छन् ।
दैलेखमा कोरोना भाइरस सङ्क्रमण समुदाय स्तरमा फैलिन थालेपछि प्रतिनिधि सभा सदस्य रबन्द्रि शर्माले निर्वाचन क्षेत्र पुर्वाधार विकास कोषको रकम मार्फत उक्त मेसिन खरिद गरिएको हो । यसका लागि एक करोड ८ लाख रकम खर्च गरिएको थियो । मेशीन पशु अस्पतालमा राख्ने तयारी भएको बताइएको छ ।
प्रतिनिधि सभा सदस्य रविन्द्र शर्माले पिसिआर मेसिन लिएर दैलेखमा पुगे सँगै सङ्घीय सरकारका स्वास्थ्य तथा जनसङ्ख्या राज्य मन्त्री नवराज रावतको टोली पनि आवश्यक औषधी बोकेर शनिबार सम्म दैलेख पुग्ने उनको सचिवालयले जानकारी दिएको छ ।
मन्त्री रावतका स्वकीय सचिव टोपेन्द्र बिसीले दैलेखमा देखिएको कोरोनाको महामारीको विषयमा जानकारी लिन र त्यसका लागि आवश्यक पर्ने औषधी बोकेर मन्त्री जिल्ला जान लागेको बताए । उनले दैलेख लगायत देशका ४ जिल्ला कोरोनाको उच्च जोखिममा रहेको स्वास्थ्य मन्त्रालयको निष्कर्ष अनुसार मन्त्री नै दैलेख पुग्ने र यहाँका अवस्थाका बारेमा जानकारी लिएर थप औषधि र चिकित्सक टोलि जिल्ला पठाउने तयारीमा रहेको बताए ।
स्वास्थ्य सेवा कार्यालय दैलेखका इन्चार्ज डाक्टर निरञ्जन पन्तले कोरोना परीक्षणका लागि आवश्यक पर्ने पिसिआर मेसिन जडान गरिए पछि स्वाब दिएको केही बेरमै रिर्पोट निकाल्न सक्ने बताए ।
