सुर्खेत : कोरोना भाइरस नियन्त्रणमा असफल भएको भन्दै नेपाली कांग्रेसले सुर्खेतले जिल्ला प्रशासन कार्यालय मार्फत सरकारको ध्यानाकर्षण गराएको छ ।
प्रमुख जिल्ला अधिकारी हिरालाल रेग्मीलाई मंगलबार पार्टीका तर्फबाट १२ बुँदे ध्यानाकर्षण पत्र दिंदै सुर्खेत काँग्रेसले कोरोना नियन्त्रणमा प्रभावकारी कदम चाल्न ध्यानार्कषण गराएको हो ।
जिल्ला प्रशासन मार्फत प्रधानमन्त्री केपी शर्मा ओलीलाई कांग्रेसले ध्यानाकर्षण पत्र बुझाएको कांग्रेस सुर्खेतका सभापति कमलराज रेग्मीले बताए ।
कांग्रेसले कोरोना महामारी नियन्त्रणमा सरकार चुकेको भन्दै परीक्षणको दायरा बढाउन, क्वारेन्टाइनको व्यवस्थापन गर्न माग गरेको छ । सभापति रेग्मीको नेतृत्वमा गएको टोलीले कर्णाली सरकारले कोरोना भाइरस नियन्त्रणमा पूर्णरुपमा असफल भएको जनाएको छ ।
कांग्रेसले कर्णाली सरकारले कोरोना नियन्त्रण तथा रोकथामका लागि गरिएको खर्च पारदर्शी गरी प्रभावकारी कार्यान्वयन गर्न नसकेको जनाएको छ । कांग्रेसले भारतबाट आउने नेपालीलाई उचित तरिकाले व्यवस्थापन गर्न माग गर्दै उनीहरुलाई पिसिआर चेक गरेरमात्र घर पठाउन आग्रह गरेको छ । कोरोना पोजेटिभ केसहरुलाई सिमटन फ्री भएको तीन दिन र १४ दिन आइसोलेशनपछि टेस्ट नै नगरी डिस्चार्ज गर्ने कार्य गरैजिम्मेवार निर्णय भएको ठहर गरेको छ ।
कोरोनाकै कारण साना ठूला उद्योग व्यवसायी बन्द भएको र हजारौ नेपालीहरु रोजगारी गुमाएर स्वदेश फर्किएकाले उद्योग व्यवसाय तथा कृषि क्षेत्रलाई चलायमान गर्न र आर्थिक संकटलाई कम गर्न गम्भीर नभएको कांग्रेसको भनाइ छ । सरकारले लकडाउनलाई ठिक ढगंले उपयोग गर्न नसकेको, अस्पतालको क्षमता वृद्धिमा ध्यान नपुगेको, कोरोना बाहेक अन्य रोगका विरामीले उपचार नभएको जनाएको छ ।
ध्यानाकर्षण पत्रमा कर्णालीमा संक्रमणको संख्या दिनप्रदिन बढ्दै जादाँ कीट नहुनु, कतिपय स्थानमा स्वाव परीक्षण बन्द हुनु, परीक्षण रिपोर्ट ढिला आउनु दुःखद भएको कांग्रेसको भनाइ छ ।
