सुर्खेत : कोरोना महामारीबीचमा देशभर युवाहरू सरकारविरुद्ध सडकमा आइरहेका छन् । कोरोना नियन्त्रण गर्न सरकार असफल भएको भन्दै युवाहरूले १० अर्बको हिसाब मागिरहेका छन् ।
कतिपयले सरकारविरुद्ध आन्दोलन चर्कदै जादा थेग्न नसक्ने अवस्था आउने चिन्ता व्यक्त गरेका छन् । नेपाली काङ्ग्रेसको थिङ्क ट्याङ्क ‘स्कुल अफ डेमोक्रेसी’ कर्णाली प्रदेश संयोजन डा. महेन्द्र कुमार मल्लले आन्दोलनकारीलाई प्रोत्साहन गर्नेगरी कविता लेखेका छन् ।
आगोको सन्तान
ए भेनेजुयलामा आँसु
बगाउनेहरू हो
बालुवाटार बिक्री गर्दा मन दुखेन र
ए ल्याण्डुप दोर्जेलाई सराप्नेहरू हो
लिम्पियाधुरा मिचिदा मुटु दुखेन र
ए दशरथहरू हो, देखेनौ र यहाँ
रोगी रोगले होइन अस्पतालको बिलले मर्ने गर्छ
अभिभावक शिक्षालयको शुल्कले मर्ने गर्छ
श्रमिक ठगिएर ठहरै पर्ने गर्छ
यसैमा मठाधीस धन्दा चलाउने गर्छ
तिनकै गर्विलो कालीगढी
आज भीमसेनको धरहराझैँ ढल्न खोज्दैछ
उसले भुइँ छाडेर आकाश रोज्दैछ
आँखाबाट बग्ने रगतहरूको कसम
माटोबाट बग्ने आँसुहरूको कसम
नदीका नीला वेदनाहरूको कसम
ए नादिरशाहीका शिष्यहरू हो, तिम्रो
मधानीको नेती चुँडिनेछ अब
हलोको हल्लुडो चुँडिनेछ अब
उतिखेर जडतामा चेतना बनेर सारा नेपाल थर्काउँदा
सुनामी बनेर छालहरूसँगै किनाराले केन्द्रलाई धक्याउँदा
कलिलो आँखाको कालो नानीले पछ्याएको आशादीप
आमाको परेली भिजाएर बाहिरिएको छ ।
ए युगका उपहसित शाहदत
तिम्रै उत्सर्गको ओत लिएर
फेरि एकपटक
चकमन्न निशाका माझबाट एउटा जुनकिरी
धिपधिप आशाको उज्यालो बनेर
घरको धुरीमाथि आउँदैछ
आकाशगंगाका नौ लाख तारामध्ये एउटा तारा
प्रकाशपुञ्जको रथमा चढेर
मेरो धर्तीमा आउँदैछ र
युग चियाउने उज्यालो छोडेर फर्किदैछ
छङछङ छङछङ गर्दै पहरामा सङ्गीत भर्ने
कुमारी झरनासँग प्रेमिल बात मार्न प्रत्येक भोरमा
सूर्य रक्तिम आभाका साथ पृथकतामा उदाइरहेको छ र
रछ्यानका फोहोर डढाउने आगो दिएर फर्किदैछ
युगका जडता र जुकाहरूलाई निमिट्यान्न पार्न
छोरोले अक्षरहरूमा साँध लगाउँदैछ
निर्जन जङ्गलमा,तर उन्मुक्त ढङ्गले
चरीले चिरबिर चिरबिर गीत गाएझैँ
छोरी नयाँ बिहानी अन्माउने र
सिर्जनाका नयाँ बीउ अङ्कुराउने
सङ्गीतका लयमा रमाउँदैछिन्
नभन्दै प्रकृति रौद्र बन्दै गइन्,हेर
मेघ गर्जियो बिजुली चम्कियो, हेर
आँधी आउनुअघिको सन्नाटा चिरिदैछ, हेर
सिंगै वायुमण्डलभरि सन्देश फैलियो
आमाको असली विद्रोही सन्तान जन्मिसक्यो
बलेसीका फोहोर फाल्न
गुँड भत्काउने बाज समात्न
प्यारो धर्तीमा एकपटक फेरि दीप प्रज्वलन गर्न
ज्वाजल्यमान स्वरूपमा
हेरत, पूर्व दिशाबाट दावानलझैँ ऊ आयो
वायुको वेगसँगै यो युगको प्रमिथस आयो
ऊ रापिलो आगोको सन्तान भएर आयो।
