काठमाडौं : सरकारले जारी गरेको लकडाउन अवधिलाई उल्लंघन गर्दै कुनै पनि स्थानमा विरोध गरे कारबाही गर्ने चेतावनी गृह मन्त्रालयले दिएको छ। बिहीबार एक प्रेस विज्ञप्ति जारी गर्दै मन्त्रालयले यस्तो चेतावनी दिएको हो।
‘नेपाल सरकारले जारी गरेको आदेशको अवहेलना गर्ने वा काममा बाधा पुर्याउने जो कोहीलाई पनि प्रमुख जिल्ला अधिकारीले कारबाही गर्न बाध्य हुनुपर्ने व्यहोरासमेत सम्बन्धित सबैलाई जानकारी गराइन्छ,’ मन्त्रालयको विज्ञप्तिमा लेखिएको छ।
नेपाल सरकार ९मन्त्रिपरिषद्० को मिति २०७६ चैत्र ९ गतेको निर्णयले मिति २०७६ चैत्र ११ गतेदेखि संक्रामक रोग ऐन, २०२० को दफा २ ले दिएको अधिकार प्रयोग गरी जारी भएको बन्दाबन्दीको आदेशलाई सरकारले पूर्ण रुपमा खुला गरेको छैन।
तर जारी लकडाउनकै बीच क्वारेन्टाइन नै चिहान बन्दै गइरहेको भन्दै युवाहरूले देशका विभिन्न स्थानमा प्रदर्शन गर्दै आएका छन्।
बिहीबार दिउँसो प्रधानमन्त्री निवास बालुवाटारमा गरिएको शान्तिपूर्ण प्रदर्शन सकिन लागेको बेला प्रहरीले जबर्जस्ती बल प्रयोग गरेको थियो। लगत्तै मन्त्रालयले कुनै पनि प्रदर्शन नगर्न सचेत गराएको हो।
