सुर्खेत : भारतबाट आएका ३९ जना नागरिकलाई कालिकोटको लालिघाट बजारदेखि रास्कोट बजार लैजाँदै गरेको टिप्पर लालिघाट नजिकैको भीरबाट कर्णालीमा खस्दा कम्तीमा २ जनाको मृत्यु भएको छ ।
बिहान साढे १० बजे तिर भएको दुर्घटनामा ११ जना घाइते भएका छन् भने ३ जना गम्भिर घाइते भएका छन् । जिल्ला प्रहरी कार्यालयका प्रमुख एवं डिएसपी श्यामबाबु वलियाले दुर्घटनामा शर्मिला सार्की र ठम्की सार्कीको मृत्यु भएको होष्ट खवरलाई जानकारी दिए । उनका अनुसार गम्भिर ३ जनाको उद्दारका लागि हेलिकप्टर मगाइएको छ । प्रहरी प्रमुख वलियाले अन्य ११ जना घाइतेको कालिकोट अस्पतालमा उपचारका लागि लगिएको र दुर्घटनास्थलबाट २२ जनाको उद्दार गरिएको बताए । उनले बेपत्ताहरुको खोजी कार्य जारी राखेको बताए ।
घटनास्थल पुगेका कालिकोटका पत्रकार विष्ण न्यौपानेका अनुसार लालिघाट बजार देखि नजिकैको भीरबाट साँघुरो कर्णाली नदीमा टिप्पर खसेको हो ।
जिल्ला प्रशासन कार्यालय कालिकोटका सहायक प्रमुख जिल्ला अधिकारी युवराज गुरागाँईले सख्त घाइतेहरुको उद्दारका लागि हेलिकप्टर मगाइएको र प्रदेश सरकारले पनि यसका लागि पहल गरेको जानकारी दिए ।
