सुर्खेत : बिहिबार मात्र भारतबाट आएका सुर्खेतका ३ जनामा आज कोरोना संक्रमण पुष्टि भएको छ । जनस्वास्थ्य सेवा कार्यालय सुर्खेतका प्रमुख चेतनीधि वाग्लेले शनिबार दिउँसो ३ जनामा कोरोना संक्रमण पुष्टि भएको बताएका हुन् ।
प्रमख वाग्लेका अनुसार कर्णाली प्रदेश अस्पतालको पिसिआर रिपोर्टनमा उनीहरुको स्वाब संकलन गरी जाँच गर्दा पोजेटिभ देखिएको र थप पुष्टिका लागि बाँकेको प्रयोगशालामा लगिएको थियो । शनिबार दिउँसो नै त्याहाँबाट पनि पुष्टि भई उनीहरुलाई अहिले उपचारमा राखिएको प्रमुख वाग्लले होष्ट खवरलाई जानकारी दिए ।
सुर्खेतको पिसिआर टेष्टलाई थप पुष्टि गर्न राष्ट्रिय प्रयोगशालाले तोकेको प्रयोगशालामा लैजानु पर्ने हुँदा थप टेष्टका लागि बाँके लगिएको प्रदेश अस्पताल कालागाँउ सुर्खेतले जनाएको छ । संक्रमितहरु बराहताल गाउपालिकाका २ र चौकुने गाउपालिकाका १ जना रहेको बताइएको छ ।
प्रदेश अस्पताल सुर्खेतका मेडिकल सुपरिटेन्डेन्ट डा. डम्बर खड्काले पुष्टि हुनासाथ उनीहरुको आइशोलेसनमा राखि उपचार शुरु गरिएको बताए । रोजगारीका शिलशिलामा भारत गएका उनीहरु बिहिबार मात्रै नेपाल सरकारले उद्दार गर्ने निर्णय बमोजिम बबई नाका हुँदै कर्णाली प्रवेश गरेका थिए ।
कर्णाली भित्रिएका सवैको कोरोना परिक्षण गरिने र पोजेटिभ देखिए उपचार गर्ने प्रदेश सरकारले बताएको थियो । पछिल्लो समय भारतबाट आउने कर्णाली प्रदेशका जनतालाई उद्दार गर्ने नीति अनुरुप हजारौंको संख्यामा कर्णालीबासी यहाँ प्रवेश गर्ने क्रम बढेको छ ।
यस संगै कर्णालीमा कोरोना संक्रमितको संख्या ४ पुगेको छ । यस अघि दैलेख आठबिसका १ जनाको पनि कोरोना उपचार प्रदेश अस्पतालमा भइरहेको छ ।
