काठमाडौं : नेपाली कांग्रेसका दुईजना नेता आफ्नो जिल्लामा विशेष लोकप्रिय छन् । उनीहरू हुन् राजीवविक्रम शाह र रामहरि खतिवडा । दुवै गत चुनावमा क्रमशः जाजरकोट र ओखलढुंगाबाट पराजित भएका थिए । शाहलाई तत्कालीन माओवादी नेता शक्ति बस्नेत र खतिवडालाई पूर्वएमालेका यज्ञराज सुनुवारले पराजित गरेका थिए ।
शाहलाई पराजित गर्ने बस्नेत अहिले वनमन्त्री छन् । तर, पनि जिल्लामा कांग्रेस नेताको विकास र जनताको सहयोगमा कुनै कमी छैन । केही समयअघि शाहले जाजरकोटमा पाँच करोडको लागतमा अस्पताल बनाएका थिए । चुनावमा पराजित भए पनि उनले जिल्लावासीको सेवामा आफूलाई क्रियाशील गराउँदै आएका छन् ।
अहिले फेरि उनले कर्णाली प्रदेशका लागि एक करोड मूल्यका स्वास्थ्य सामग्री पठाउने तयारी गरेका छन् । शाहको विशेष पहलमा कुमारी ट्रस्टमार्फत कोभिड १९ नियन्त्रणका लागि कर्णाली प्रदेश अस्पताल सुर्खेतमा भेन्टिलेटरसहित ७० लाख र प्रदेशका अन्य १०जिल्लामा तीन लाखको दरले ३० लाख गरी जम्मा एक करोडको स्वास्थ्य सामाग्री कर्णाली प्रदेशमा पठाउने भएका छन् । जसको अहिले प्रशंसा भइरहेको छ ।
उता, कोरोना महामारीका बेला पनि नेता रामहरि खतिवडाको समाजसेवा रोकिएको छैन । जिल्लाका विकास र गरिब तथा विप्पन वर्गका लागि खतिवडाले राहत सामग्री जुटाउँदै आएका छन् ।
