एजेन्सी : पूर्व अमेरिकी राष्ट्रपति बाराक ओबामाले ट्रम्प प्रशासनको गम्भीर आलोचना गरेका छन् ।
पूर्व राष्ट्रपति ओबामाले सार्वजनिक रुपमा कोरोना भाइरसको महामारी नियन्त्रणको प्रयासमा वर्तमान प्रशासनले गम्भीर त्रुटी गरेको भन्दै आलोचना गरेका हुन् । एक हप्ताको अवधिमा उनले ट्रम्प प्रशासनमाथि दोस्रो पटक आक्रमण गरेका हुन् ।
स्थानीय समय अनुसार शनिबार बेलुका अमेरिकाका ४४ औं राष्ट्रपति ओबामाले यो वर्ष कलेजबाट दीक्षित भएकाहरुको भर्च्यूअल दीक्षान्त समारोहको प्रारम्भमा गरेको सम्बोधनमा ट्रम्प प्रशासनको आलोचना गरेका हुन् ।
पूर्व राष्ट्रपति ओबामाले दीक्षित भएका विद्यार्थीलाई सम्बोधन गर्दै सत्ताको बागडोर सम्हालेका व्यक्तिले सधैँ आफूले के गरिरहेको छु भन्ने थाहा नपाउने बताएका हुन् ।
ओबामाले राष्ट्रपति डोनाल्ड ट्रम्पको नाम नलिइ कोरोना भाइरस महामारी नियन्त्रणका लागि हालको प्रशासनले गरेको कामको आलोचना गरे ।
एक हप्ताअघि आफू राष्ट्रपति रहेका बेला सँगै काम गरेकाहरुसँगको निजी छलफलको क्रममा ओबामाले ट्रम्प प्रशासनको आलोचना गरेका थिए । ट्रम्प प्रशासनले कोभिड–१९ नियन्त्रणमा लिनका लागि गरेको प्रयास अपर्याप्त भएको ओबामाले उल्लेख गरेका छन् ।
