सुर्खेत : नेपाली काँग्रेसका महामन्त्री तथा पूर्व गृहमन्त्री पूर्णबहादुर खड्काले सरकारले भारतमा अप्ठयारोमा परेका नेपालीलाई ब्यवस्थित तरिकाले नेपाल ल्याउने प्रबन्ध नगर्नु नै कोरोना संक्रमणको डरलाग्दो बिस्तारको मूल कारण भएको बताएका छन् । भारतमा रहेका नेपालीलाई सरकारले व्यवस्थित तरिकाले ल्याउन नसक्दा बाध्य भएर नागरिकको अबैध मार्गको लुकिछिपि नेपाल प्रवेश नै संक्रमणको मूल श्रोत भएको बताएका हुन् ।
नेपालमा कोरोना संक्रमण बढ्नुमा भारतमा अप्ठयारोमा परेका नेपालीलाई नेपालमा व्यवस्थित रुपमा नेपालमा ल्याउन नसक्नु मुल कारण भएको महामन्त्री खड्काले फेसबुकमा लेखेका छन् ।
अबका दिनमा विदेशमा रहेका नेपालीलाई बैधमार्गबाट नै नेपालमा ल्याउन सरकारलाई महामन्त्री खड्काले सुझव दिएका छन् । ‘विदेशमा (बिशेषगरि भारतमा) अप्ठयारोमा परेका नेपाली लाई बैधमार्गबाटै ब्यवस्थित तरिकाले आउने प्रबन्ध गर्ने व्यवस्था मिलाइनुपर्छ ।’ उनले भनेका छन्,‘सबैलाई कोरेन्टाईनमा राख्ने र सबैको अनिवार्य पिसिआर बिधिबाट परिक्षण गर्ने, अहिलेको जस्तो एउटै कोठामा बसेका धेरै मध्ये १/२ जनाको सेम्पलिङ परीक्षणको आत्मघाति तरिका होईन सरकार ?’
महामन्त्री खड्काले यो समस्या समधानका लागि संघीय सरकार र प्रदेश सरकारले प्रयाप्त बजेट उपलब्ध गराई कोरेन्टाईन लगायतको ब्यवस्थापनको जिम्मा ७५३ स्थानीय सरकारलाई दिने माग समेत गरेका छन् । ‘प्रदेश सरकारले समग्र ब्यवस्थापनको अनुगमन र समन्वयको काम गर्ने ?’ उनले लेखेका छन्,‘संघले प्रयाप्त बजेट, जनशक्ति र सामाग्री उपलब्ध गराउने साथै केन्द्रीयस्तरबाट प्रदेश र स्थानीय सरकारको कामको समन्वय र अनुगमनको जिम्मा लिने व्यवस्था गरिनुपर्छ ।’
