सुर्खेत : सुर्खेतमा मानिसहरुले लकडाउन उल्लंघन गरेपछि प्रहरी प्रशासनले कडा कारबाही गर्न थालेकोछ । आइतबार बैंक तथा बित्तिय संस्थाहरु खुल्न दिने सरकारी निर्णय संगै सर्वसाधारण जनता मनपरी घरबाहिर निस्कन थालेका हुन् ।
जिल्ला प्रहरी कार्यालय सुर्खेतले आइतबार र सोमबार मानिसहरुको भीडभाड बढेको हुँदा चेकजाँचमा कडाई गरेको जनाएको छ । प्रहरी कार्यालय सुर्खेतका प्रहरी निरिक्षक गोपाल रायमाझीले लकडाउन उल्लंघन गर्ने जो कोहीलाई कारबाही गरिने बताए । उनले सोमबार मात्रै ८४ वटा सवारी साधन कारबाहीमा परेको बताए ।
४ पांङ्ग्रे र मोटरसाइकल सहित ८४ वटा सवारी साधन एकै दिन कारबाहीमा परेको प्रहरी निरिक्षक रायमाझीको भनाई छ । एम्बुलेन्स समेत सवारी चेकजाँचका क्रममा कारबाहीमा परेको उनले होष्ट खवरलाई बताए । ‘स्वास्थ्य सुरक्षा सामग्री प्रयोग नगरी चलाएको एक एम्बुलेन्स समेत कारबाहीमा परेको छ’, उनले भने, ‘यी सवारी साधनलाई अधिकतम जरिवाना सहित कारबाही गरेर छाडिने निर्देशन छ ।’
लकडाउन यता २ सय सवारी साधन कारबाहीमा परेको प्रहरी निरिक्षक रायमाझीले बताए । मतहतका निकायको संख्या जोड्ने हो भने धेरै संख्या आउने उनको भनाई छ । नागरिककै सुरक्षाका लागि प्रहरी अहोरात्र खटिएको भएपनि चेतना भएरपनि त्यसको उल्लंघन गर्ने नागरिकलाई कारबाहीको दायरामा ल्याउने उनले बताए ।
मंगलगढी चोकमा सवारी चेकजाँचमा खटिएका ट्राफिक प्रहरी हवल्दार विष्णुबहादुर थापाले सवारी चेकजाँचमा कडा नीति अवलम्बन गरेको जानकारी दिए । सुर्खेतमा लकडाउन उल्लंघनमा नागरिकले व्यापक लापरबाही गरेको उनको ठम्याई छ ।
