तुलसीपुर : प्रहरीले व्यवसायीमाथि अनावश्यक धरपडक तथा लाठी चार्ज गरेको भन्दै तुलसीपुर बजारका अत्यावश्यक पसलहरु अनिश्चित कालकालागि वन्द गरिएको छ।
तुलसीपुर उद्योग वाणिज्य संघ दाङले शुक्रवार एक विज्ञप्ति जारी गरी व्यवसायीमाथी प्रहरी दमन भएको उल्लेख गर्दै तुलसीपुर क्षेत्रमा अनिश्चित कालिन रुपमा व्यापार, व्यवासय लगाएत सबै प्रकारका सेवाहरु बन्द गर्ने निर्णय गरेको हो ।
संघका अध्यक्ष विरबहादुर रावतले ईलाका प्रहरी कार्यालय तुलसीपुरले गरेको ज्यादतिका विरुद्ध व्यापारिहरु आन्दोलित बनेको बताए ।
उनका अनुसार कोरोना भाईरसको संक्रमणवाट वच्न सरकारले चैत्र ११ गते देखि शुरु गरेको लकडाउनका कारण सर्वसाधारणको दैनिकी कष्टकर वन्दै गएपछि तुलसीपुर क्षेत्रका अतिआवश्यक खाद्यान्नका पसलहरु विहान ६ बजेदेखि ९ वजेसम्म खोल्ने निर्णय भएको थियो ।
स्थानीय सरकार र प्रहरी प्रशासनसंगको समन्वयमा खोलिएका पसलहरुमा आएर प्रहरीले जथाभावी लाठी प्रहार गरेको भन्दै तुलसीपुरका व्यापारीहरुले अनिश्चित कालका लागि सबै व्यापार व्यवसाय, उद्योग कलकारखाना वन्द गर्ने निर्णय गरेका हुन ।
शुक्रवार तुलसीपुर उद्योग वाणिज्य संघमा भएको छलफलपछि व्यवसायीहरुले प्रहरीले कृष्ण वहादुर पुन, कालु जैसी लगायतको पसल भित्रै गएर व्यवसायीलाई कुटपिट गरेको घटनाको निन्दा गर्दै गम्भीर ध्यानाकर्षण भएको जनाएका थिए ।
तुलसीपुर उद्योग वाणिज्य संघका अध्यक्ष विर वहादुर रावतको अध्यक्षतामा वसेको बैठकमा वोल्ने अधिकांस वक्ताहरुले ग्यासलगायतका अतिआवश्यक वस्तुहरु समेत सरल रुपमा विक्रिवितरण र आवत जावतमा अवरोध पुरयाएको भन्दै ईलाका प्रहरी कार्यालय तुलसीपुरको ध्यानाकर्षण गराएका थिए ।
बैठकमा संस्थापक अध्यक्ष डिल्ली वहादुर वस्नेत, पूर्व अध्यक्षहरु गणेश प्रेम श्रेष्ठ, चिरन्जीवी रिजाल, उत्तम कुमार श्रेष्ठ, हेमन्त कुमार रिजाल, विमल रिजाल लगायतले व्यवसायीको हकहितका लागी स्थापना भएको संस्थाले सबै सदस्यहरुको संरक्षण गर्ने दायित्व वोकेको भन्दै अन्यायमा परेका व्यवसायीहरुका लागि आफूहरु जस्तो सुकै चुनौतिको पनि सामना गर्न तयार रहेको वताएका थिए ।
व्यवसायीहरुवाट पटक पटक गुनासो आए पछि वाणिज्य संघले ईलाका प्रहरी कार्यालय तुलसीपुरका प्रमुख डिएसपी हरिहरनाथ योगी संग छलफल र समस्या राखेका थिए । कार्यालय प्रमुखवाट प्रतिवद्धता भएपनि त्यसको कार्यान्वयन नभए पछि वाध्य भएर व्यवसायीको सुरक्षा लाई मध्यनजर गर्दै व्यापार व्यवसाय वन्द गर्नु परेको विज्ञप्तिमा उल्लेख गरिएको छ ।
