काठमाडौं : भारतीय नागरिकको हुल झापास्थित नेपाल भारत सीमाबाट आक्रमण गर्दै जबर्जस्ती नेपाल छिर्न खोजेपछि सशस्त्र प्रहरीले हवाई फायर गरेको छ ।
त्यस क्रममा सीमामा खटिएका सशस्त्र प्रहरीले दुई राउन्ड हवाई फायर गर्दै त्यो समूहलाई भगाएको झापा जिल्ला प्रहरी कार्यालयले जानकारी दिएको छ ।
हिजो राति सय जनाजतिको संख्यामा भारतीय नागरिक झापाको झापा गाउँपालिका वडा नम्बर ४, टागन डुब्बास्थित सीमा नाकाबाट जबर्जस्ती प्रवेश गर्न खोजेपछि सशस्त्र प्रहरीले रोकेका थिए ।
कोरोना भाइरस संक्रमणको महामारीका कारण एक महिनाभन्दा बढी समयदेखि नेपाल र भारत दुवैतर्फ लकडाउन गरिएको छ ।
दुई जना भारतीय नागरिक नेपाल प्रवेश गर्न खोजेपछि प्रहरीले रोकेको थियो ।
सीमामा ओहोरदोहोर गर्न नदिएपछि ती फर्काइएका दुई ब्यक्तिले ४० ५० जनाको समूह बनाएर साँझ आक्रमणको प्रयास गरेका थिए । सीमामा खटिएका प्रहरीमाथि आक्रमणको प्रयास भएपछि हवाई फायर गरिएको एसपी कृष्ण कोइरालाले बताए ।
भारतीय युवाहरुले जवरवस्ति गर्न खोजेपछि प्रहरीले गोली चलाएको झापा गाउँपालिकाका स्थानीयले बताएका छन् । प्रहरीले हवाई फायर गरेपछि युवाहरुको समूह तितरवितर भएको थियो ।
घटनापछि झापामा भारतसँग सिमा जोडिएका क्षेत्रमा बाक्लो संख्यामा जनपथ र सशस्त्र प्रहरी परिचालन गरिएको छ ।
