सुर्खेत : नेपालगञ्ज र रुपन्देहीमा थप २ जना कोरोना संक्रमित फेला परेका छन्। स्वास्थ्य तथा जनसंख्या मन्त्रालयका अनुसार बाँकेको नेपालगञ्ज र रुपन्देहीमा कोरोना संक्रमित भेटिएका हुन्।
रुपन्देहीका २५ वर्षीय पुरुष र नेपालगञ्जका ६० वर्षीय पुरुषमा संक्रमण भेटिएको मन्त्रालयले जनाएको छ।
शुक्रबार पुष्टी भएकामध्ये एकजनाको राष्ट्रिय जनस्वास्थ्य प्रयोगशालामा गरिएको परीक्षणबाट कोरोना पुष्टि भएको हो भने अर्काको नेपालगञ्जस्थित भेरी अस्पतालकै ल्याबमै गरिएको पिसिआर परीक्षणमा कोरोना देखिएको हो । उनीहरु दुईमध्ये एकजना विदेशबाट आएको खुलेको छ ।
अर्का बिरामी भने रुपन्देहीका बासिन्दा हुन् । तर उनलाई नेपालगञ्जकै आइसोलेसनमा राखेर उपचार भइरहेको थियो । भेरी अस्पताल नेपालगञ्जमा गरिएको परीक्षणमा बाँकेका ६० वर्षीय पुरुषमा कोरोना संक्रमण देखिएको हो ।
संक्रमितको अवस्था सामान्य रहेको छ। योसँगै नेपालमा कोरोना संक्रमितको संख्यमा ५९ पुगेको छ। त्यस्तै संक्रमणपछि निको भएर १६ जना घर फर्किसकेका छन्।
