सुर्खेत : कर्णाली प्रदेशमा कोरोना भाइरस (कोभिड–१९) को संक्रमण भए नभएको बारे थाहा पाउने स्वाव परिक्षण गर्ने कार्य पुनः सञ्चालन भएको छ ।
प्रयोगशालामा खटिएका स्वास्थ्यकर्मीहरु चार दिनदेखि ठूलो क्षमताको पीसीआर मेसिन जडानमा जुटेकाले स्वाव परिक्षण केही दिन रोकिएको थियो । सोमबार साँझ नै ठुलो पीसीआर मेसिन जडान भएपछि आजदेखि स्वाव परिक्षण शुरु गरिएको हो ।
कर्णाली प्रदेशका अधिकांश जिल्लाबाट संकलन भएको स्वाव आएपछि त्यसको क्षतमाले धान्न नसक्दा परिक्षण कार्य रोकिएको भएपनि आजदेखि परिक्षण शुरु गरिएको कर्णाली प्रदेश स्वास्थ्य निर्देशनालयका प्रयोगशाला संयोजक ओम आचार्यले जानकारी दिए ।
‘यस अघिको क्षमताले धान्न नसक्दा अहिले ठूलो मेसिन गरिएको छ, ‘ मेसिन जडानका लागि १० जना अहोरात्र खटिएर आज देखि नै परिक्षण शुरु भएको छ ।’ उनका अनुसार ‘निर्देशनालयको प्रयोगशालाले ठूलो क्षमता धान्न नसके पछि अहिले परिक्षण कार्य रोकिएको हो । जडान गर्न लागिएको ठूलो मेसिनलाई भूमि व्यवस्था, कृषि तथा सहकारी मन्त्रालयको पशु अन्वेषण प्रयोगशाला राखेर जडान भैरहेको प्रयोगशालाले जनाएको छ ।
आज सुर्खेत र दैलेखबाट संकलन भएका ७४ वटा स्वाव परिक्षण हुने पनि संयोजक आचार्यले बताए । ठुलो मेशीनबाट एक दिनमा ६० देखि ७० वटा सम्म परिक्षण गर्न सकिने उनको भनाई छ । मेसिनको क्षमता भने एक पटकमा ९६ वटा सम्म परिक्षण गर्ने रहेको उनले जानकारी दिए ।
प्रयोगशाला प्रदेश अस्पतालको आडमै भए पनि त्यहाँ ठूलो मेसिनलाई चाहिने स्रोतसाधनको अभाव भएको हुँदा मन्त्रालयको पशु अन्वेषण प्रयोगशालामा राखिएको हो । यसअघि पीसीआर मेसिन प्रदेश अस्पतालको आफ्नै भवनमा सञ्चालनमा ल्याइएको थियो ।
