सुर्खेत : पूर्वी सुर्खेतको सिम्ता गाँउपालिकाले आफ्ना नागरिक विरामी भए औषधी र स्वास्थ्यकर्मी सहित घरमैं पुग्ने गरेको खवर छ । सरकारले गत चैत ११ गते देखी लकडाउन गरेको अवस्थामा स्वास्थ्य सेवा जनताको घर दैलोमैं पुगेर दिन गाँउपालिकाले यस्तो अभियान शुरु गरेको हो ।
गाउँपालिका अध्यक्ष कबिन्द्र कुमार केसीले गाउँपालिका भित्रका कुनै नागरिक बिरामी भएमा स्वास्थ्यकर्मी र औषधि लिएर घरमा नै पुग्ने गरेको बताए। ‘अहिलेको अबस्थामा मानिसहरु उपचारको लागी स्वास्थ्य संस्थासम्म जाने अबस्था छैन्, त्यसैले हामीले कुनै पनि नागरिकमा स्वास्थ्य समस्या देखिएमा घरमा नै गएर उपचार गर्ने ब्यबस्था मिलाएका छौँ ‘, उनले भने ।
गाँउपालिकाले आवश्यक औषधी र स्वास्थ्यकर्मीको व्यवस्थापन गरी यस अभियानको शुरुवात गरेको बताइएको छ । गाउँ गाँउ पुगेर संक्रामक रोग र यसबाट बच्ने उपाय बारे सचेतिकरण समेत गर्दै आएको पालिका अध्यक्ष के.सी.ले बताए ।
बिहीवार मात्रै अध्यक्ष केसी, स्वास्थ्य शाखा संयोजक विरेन्द्र पुन, सुरक्षाकर्मी सहितको टोली कापृचौर वडा कार्यालय, स्वास्थ्य चौकी, डाँडाखाली लगाएतका बिभिन्न ठाँउमा गएर सचेतिकरण गरिएको गाउपालिकाले जनाएको छ ।
यस्तै बिदेशबाट फर्किएका नागरिकको स्वास्थ्य अबस्थाको वारेमा गाउँपालिकाले जानकारी लिने काम समेत गरेको छ । लक डाउन अवधिभर गाउँपालिका भित्र नयाँ व्यक्तिलाई जान समेत निषेध गरिएको छ । गाउँपालिकामा कोरोना रोकथाम तथा नियन्त्रण गर्नका लागि ७५ वटा युनिट गठन गरी तिनलाई समेत प्रभावकारी रुपमा काम गर्न निर्देशन दिईएको छ ।
तस्विरहरु : गाँउपालिका अध्यक्ष के.सी.को फेशबुक वालबाट ।
