काठमाण्डौं : दुई जनामा कोरोना भाइरसको संक्रमण देखिएपछि पेप्सिकोलास्थित सनसिटी अपार्टमेन्टमा बसिरहेका सबै जनाको र्यापिड डाइग्नोस्टिक टेस्ट (आरडीटी) गर्न थालिएको छ।
बुधबार बिहान साढे नौ बजेबाट र्यापिड डाइगोनेस्टिक किट (आरडीटी) विधिबाट ब्लक ‘ए’ का २४२ जनाको परीक्षण गर्न लागिएको हो । ब्लक ‘ए’ का २४२ जनाको परीक्षण गर्दा सबैको नेगेटिभ रिपार्ट आएमा अरू ब्लकको परीक्षण गर्न नर्पने स्थानीयले बताउदैँ आएका छन । तर सरकारले सबै ब्लकको परीक्षण गर्नेगरी तयारी गरीराखेको छ ।
स्वास्थ्य अवस्था कमजोर भएका, ज्येष्ठ नागरिकहरूलाई प्राथमिकता दिएर तीन वटा टेबलबाट परीक्षण भइरहेको छ ।
चार जनाको समुहले र्यापिड टेस्ट गरीरहेका छन । यो जनशक्ति एकदमै न्युन हो । यत्तिले मात्र टेस्ट गर्ने हो भने सो अपार्टमेन्टमा रहेका सबैको टेस्ट गर्दा एक हप्ता भन्दा बढी लाग्ने देखिन्छ । सनसिटीमा पाँच वटा ब्लक छन् । त्यहाँ ५ सय परिवारका करिब पन्ध्र सय जना बस्दै आएका छन् ।
सोमबार र्यापिड टेस्ट गर्दा गत चैत ५ गते लन्डनबाट आएका तीन जनामा कोरोनाको एन्टीबडी देखिएको थियो। त्यसपछि तीनै जनालाई पाटन अस्पताल भर्ना गरेर राष्ट्रिय जनस्वास्थ्य प्रयोगशालामा स्वाब परीक्षण गरिएको थियो।
राष्ट्रिय जनस्वास्थ्य प्रयोगशालामा गरिएको परीक्षणमा आमा र छोरामा कोरोना देखिएको थियो भने बुहारीमा देखिएको थिएन्। अहिले दुवै जना आमा र छोराको पाटन अस्पतालमा उपचार भइरहेको छ। उनीहरुको अवस्था सामान्य रहेको छ।
