नेपाल समाचारपत्र /एजेन्सी : चीनको बुहान सहरमा कोरोना भाइरस संक्रमणको पहिलो घटना अगाडि आएको थियो । त्यसपछि चीनमा भयावह बन्दै विश्व महामारी बनेको कोरोना भाइरस संक्रमणले युरोप र अमेरिकामा बितन्डा मच्चाइरहेको छ ।
विश्वभरि फैलिसकेको यो महामारीलाई रोक्ने अहिलेसम्म कुनै प्रभावकारी औषधि र खोप विकास हुन सकेको छैन । यद्यपि विश्वभरिकै अनुसन्धानकर्ता यो संकटको समाधान छिटोभन्दा छिटो निकाल्ने प्रयासमा छन् ।
यसबीच चीनमा कोविड –१९ को खोपको परीक्षण भइरहेको छ । यो परीक्षणको दोस्रो चरण बताइएको छ । यो खोप चीनको इन्स्टिच्युट अफ बायोटेक्नोलोजी, एकेडेमी अफ मिलिटरी मेडिकल साइन्सेज अफ चाइनाले विकास गरेको हो । मानव शरीरमा यसको दोस्रो परीक्षण शुरु गरिएको छ । यसमा ५ सय स्वयंसेवकलाई खोप दिने काम भएको छ ।
स्वयंसेवकमा सबैभन्दा बढी उमेर ८४ वर्षका वृद्ध उहानको भएको सरकारी सञ्चारमाध्यम चाइना डेलीले जनाएको छ । उनलाई सोमबार उक्त खोप लगाइएको थियो । यो खोप जेनेटिक इन्जिनियरिङ पद्धतिबाट बनाइएको समाचारमा उल्लेख गरिएको छ ।
यो खोपले कोरोना भाइरस संक्रमणबाट निम्त्याउने रोगलाई रोक्नेछ । पहिलो चरणमा खोप परीक्षणमा यसको सुरक्षामा ध्यान दिइएको थियो भने अबको दोस्रो चरणमा यसको क्षमतामा केन्द्रित गरिएको छ । पहिलो चरणको भन्दा फरक दोस्रो चरणमा धेरै जनालाई यसमा संलग्न गराइएको छ ।
स्वयंसेवकहरुलाई जोड्ने यो अभियान बिहीबारबाटै थालिएको थियो । खोपको पहिलो चरण मार्चमा पूरा भएको थियो ।
अमेरिकाको सीएटल र वासिंगटनमा केसर पर्मानेट रिसर्च फेसिलिटीमा खोपको काम शुरु भएको समाचार बाहिर आएपछि चीनले पनि औषधि खोजको काममा तीव्रता दिएको हो ।
अहिले यस महामारीले सबैतिर भयावहको स्थिति बनाइसकेको स्थितिमा औषधि विकास गर्न पनि विश्वव्यापी होडबाजी सुरु भएको हो । यस भाइरसको निदान खोज्न अस्ट्रेलिया, बेलायत, फ्रान्स, रुस र भारतमा पनि खोप विकासका लागि काम भइरहेको छ ।
चीनले खोप विकासमा सम्भवतः प्रारम्भिक अग्रता लिइसकेको अनुमान गरिएको छ । किनभने नोबेल कोरोना भाइरसको जिनोम सिक्वेन्सको म्यापिङ चीनले गरिसकेको छ । यो हुनुमा भाइरसको पहिलो संक्रमण चिनियाँ सहर उहानमा पत्ता लागेकोले पनि हो । त्यसपछि चीनले डब्ल्यूएचओ, अमेरिका र अन्य देशसँग पनि यसको जिनोम सिक्वेन्स साझा गरेको थियो ।
यसबीच चिनियाँ सरकारले दशभरि कोविड १९ का सम्बन्धमा शोध प्रकाशनमा प्रतिबन्ध लगाएको छ । यस सम्बन्धी कुनै पनि शोध प्रकाशित गर्न त्यसले कयौं स्तरको जाँचको सामना गर्नुपर्नेछ ।
चीनमा कोरोना भाइरसको उत्पत्तिलाई लिए भइरहेका शोधमाथि पनि नियन्त्रण गरिएको छ । शिक्षा विभागले विश्व विद्यालयहरुलाई अन्तर्राष्ट्रिय अखबारमा कुनै शोध प्रकाशन गर्नुअघि उसको अनुमतिलाई अनिवार्य भएको निर्देशन दिइसकेको छ, यो समाचार आजको नेपाल समाचारपत्र दैनिकमा छापिएको छ ।
