नेपाल समय/सुर्खेत : शुक्रबार (आज)बाट कर्णाली प्रदेशमा कोरोना भाइरसको र्यापिड टेष्ट हुने भएको छ ।
कोरोना परीक्षणको लागि सुर्खेतस्थित कर्णाली प्रदेश स्वास्थ्य निर्देशनालयको प्रयोगशालाले आरटी–पीसीआर (रियल टाइम पोलिमरेज चेन रियाक्सन) मेसिन परीक्षणको भार थेग्न नसकेपछि र्यापिड टेष्ट प्रविधि अपनाउन थालिएको कर्णाली प्रदेश स्वास्थ्य निर्देशनालयले जनाएको छ ।
पहिलो चरणमा ५ हजार जनाको र्यापिड टेष्ट गरिने कर्णाली प्रदेश स्वास्थ्य निर्देशनालयका निर्देशक रिता भण्डारी जोसीले जानकारी दिइन् । ‘कोरोना परीक्षणका लागि ५ हजार किट कर्णालीमा आइपुगेको छ, पहिलो चरणमा ५ हजार जनाको मात्रै र्यापिङ टेष्ट गर्छौँ,’ भण्डारीले भनिन्, ‘र्यापिड र पीपीआर प्रविधिबाट आशंका गरिएका सबैको परीक्षण सकिएन भने थप किट ल्याएर र्यापिड टेष्ट गर्छौँ।’
कर्णाली प्रदेशमा कालिकोटबाट र्यापिड टेष्ट सुरु गरिने छ । विदेशबाट आएका र क्वारेन्टाइनमा बसेका सबैको टेष्ट गरिने निर्देशनालयले जनाएको छ ।
त्यसो त सुर्खेतमा कोरोना परीक्षण प्रयोगशाला स्थापना भएको सात दिनको अवधिमा ८५ जनाको मात्रै नमूना परीक्षण गरिएको छ । बिहीबार साँझ ६ बजेसम्म ८५ जनाको परीक्षण सकिएको कर्णाली प्रदेश स्वास्थ्य निर्देशनालयले जनाएको छ ।
निर्देशनालयका प्रयोगशाला संयोजक ओम आचार्यका अनुसार २० गते ४, २१ गते ११, २२ गते १५, २३ गते ११, २४ गते १३, २५ गते १२, २६ गते ७ र हिजो ६ बजेसम्म १२ वटा गरी ८५ जनाको नमूना परीक्षण गरिएको छ।
११६ जनाको परीक्षण, सबै नेगेटिभ
कर्णाली प्रदेशबाट अहिलेसम्म १ सय १६ जनाको कोरोनाको नमूना परीक्षण गरिएको छ । सुर्खेतमा प्रयोगशाला स्थापना भएपछि ८५ र काठमाडौंमा परीक्षण गरिएका ३१ जनाको गरी कुल १ सय ३१ जनाको परीक्षण गरिएको प्रदेश स्वास्थ्य निर्देशनालयले जनाएको छ । परीक्षण गरिएका सबैको नतिजा नेगेटिभ आएको छ ।
सुर्खेतमा स्थापना भएको प्रयोगशालाको क्षमता न्यून भएपछि परीक्षणका लागि कर्णालीका अधिकांश रिपोर्ट काठमाडौंमै हुने निर्देशनालयले जनाएको छ । कोरोना परीक्षणका लागि कर्णालीका ५ सय ८६ जनाको स्याम्पल काठमाडौं पठाइएको छ । गत मंगलबार ५०१ वटा र आज ८५ वटा गरी स्याम्पल काठमाडौं पठाइएको हो ।
कोरोनाको उच्च जोखिम
कर्णाली प्रदेश कोरोनाको उच्च जोखिममा छ । एकातिर छिमेकी अर्थात् सुदूरपश्चिममा कोरोनाका संक्रमित बढ्दै जानु अर्कोतिर विदेशबाट आएका आठ हजार बढीको स्वास्थ्य परीक्षण नहुनु यी दुई कारणले कर्णालीमा कोरोनो उच्च जोखिम छ ।
तर कोरोनाको परीक्षण भने कछुवा गतिमा भएको छ । किनकी कोरोनाको त्रासपछि गाउँ फर्किएका ८ हजारमध्ये हालसम्म १ सय १६ जनाको मात्रै कोरोना परीक्षण गरिएको छ ।
के हो र्यापिड टेष्ट प्रविधि ?
र्यापिड टेष्ट कोरोना परीक्षण गर्ने द्रुत प्रविधि हो । किटको माध्यमबाट कोरोना भए नभएको पूर्व जानकारी लिन सजिलो हुन्छ । र्यापिड टेस्टले कोरोना भएको ठ्याक्कै यकिन भने गर्दैन । पोजिटिभ देखियो वा मिल्दोजुल्दो लक्षण देखियो र स्वास्थ्यकर्मीलाई बढी शंका लागेको खण्डमा तत्काल नमुना सङ्कलन गरेर पुनः परीक्षण गर्न सजिलो हुन्छ ।
कर्णाली स्वास्थ्य प्रयोगशाला संयोजक ओम आचार्यका अनुसार र्यापिङ टेष्टले कोरोना हुनसक्ने व्यक्तिको पूर्व पहिचान गर्न सकिन्छ ।
शरीरको इम्युनिटी पावर (रोग प्रतिरोधात्मक क्षमता) का आधार कोरोना हुन सक्ने सम्भावित लक्षण पत्ता लगाउन मद्दत गर्दछ । र्यापिड टेष्ट गर्दा पोजिटिभ देखियो वा आशंका लागेको खण्डमा पीसीआर विधिबाट तत्काल चेक गरी कोरोना भएको पुष्टि गर्न सकिन्छ ।
कोरोनासँग मिल्दोजुल्दो लक्षण देखिएका र विदेशबाट आएका व्यक्तिको र्यापिड टेष्टबाट कोरोनाको चेकजाँच गरिने छ । यसले करिव १५ देखि २० मिनेटभित्र कोरोना हुन सक्ने व्यक्तिको पहिचान गर्दछ ।
नेपाल समयबाट साभार गरिएको
