कैलाली : सुदूरपश्चिम प्रदेशका विपन्न, असहाय र ज्यालादारी मजदुरका परिवारलाई प्रदेश सरकारले प्रतिपरिवार तीन हजार रुपैयाँ राहत दिने भएको छ ।
विपन्न परिवारलाई स्थानीय सरकारमार्फत राहत दिने निर्णय भएको आन्तरिक मामिला तथा कानुन मन्त्री तथा प्रदेश सरकारका प्रवक्ता प्रकाशबहादुर शाहले जानकारी दिए । ‘अति विपन्न, असहाय र ज्यालादारी मजदुरका परिवारलाई ३ हजारका दरले राहत दिइने छ’, मन्त्री शाहले भने, ‘प्रदेश सरकारले स्थानीय तहलाई १६ करोड सहयोग गर्ने छ ।’
प्रदेश सरकारले स्वास्थ्यकर्मी सुरक्षाकर्मी र सञ्चारकर्मीको समेत बिमा गर्ने निर्णय गरेको छ ।
प्रदेशमा कार्यरत स्वास्थ्यकर्मी र सुरक्षाकर्मीको १५ लाखको र सञ्चारकर्मीको १५ लाख रुपैयाँको बीमा गर्ने निर्णय गरिएको प्रदेश सरकारका प्रवक्ता समेत रहेका आन्तरिक मामिला तथा कानुन मन्त्री प्रकाश शाहले जानकारी दिए ।
त्यस्तै अस्पतालहरुमा अस्पता विकास समिति मातहत रहेका स्वास्थ्यकर्मीलाई पनि प्रोत्साहन भत्ताको ब्यवस्था गरिने उनले बताए ।
२० भेन्टिलेटर खरिद गर्ने
प्रदेशका विभिन्न जिल्लाका लागि २० वटा भेन्टिलेटरको खरिद गर्ने निर्णय भएको छ । प्रदेशमा भेन्टिलेटरको अभाव छ । यस्तै जिल्ला प्रशासन कार्यालयलाई ५ लाखका दरले कोरोना रोग नियन्त्ररण र व्यवस्थापनका लागि रकम उपलब्ध गराउने निर्णय भएको छ । नेपाली सेना, शसस्त्र प्रहरी र नेपाल प्रहरीको लागी १५ लाखका दरले रकम उपलब्ध गर्ने भएको छ । कोरोना रोग व्यवस्थापनका लागि उक्त रकम उपलब्ध गर्ने निर्णय प्रदेश सरकारले गरेको छ ।
मन्त्रीपरिषद् बैठकले कोस सञ्चालन निर्देशिका र राहत वितरण मापदण्ड पारित गरेको छ । मन्त्रीपरिषद् बैठकले प्रदेशमा फाल्गुन मसान्तसम्म तिर्नुपर्ने कर सुल्क र दस्तुरको अवधि बैसाख मसान्तसम्म थप गप्ने निर्णय गरेको प्रदेश सरकारले जानकारी दिएको छ ।
