सुर्खेत : भारतबाट फर्केका कर्णालीका ५ सय २५ जना क्वारेन्टाइनमा बसेको कर्णाली प्रदेश प्रहरी कार्यालयले जनाएको छ । भारत तथा अन्य देशबाट फर्किएका लाई क्वारेन्टाइनमा राख्न सरकारले निर्देशन दिएपछि भारतबाट फर्किएकालाई विभिन्न जिल्लाका क्वारेन्टाइनमा राखिएको हो ।
प्रदेश प्रहरी कार्यालयका सूचना अधिकारी लोकनाथ तिम्सिनाले सुर्खेतमा एक सय ९२, दैलेखमा २, जाजरकोटमा ८, रुकुम पश्चिममा ३०, सल्यानमा २१, डोल्पामा एक सय ३०, जुम्लामा ७८ जना, मुगुमा ९ र कालिकोटमा ५५ जना क्यारेन्टाइनमा राखिएको बताए ।
उच्च ज्वरो आएका कारणले जुम्लामा एक जनालाई आइसोलेसनमा राखिएको छ । सबैभन्दा बढी भारतबाट आएकालाई क्वारेन्टाइनमा राखिएको जनस्वास्थ्य सेवा निर्देशनालयकी निर्देशक रीता जोशी भण्डारीले जानकारी दिइन् । ‘कर्णालीको प्रमुख रोजगारीको गन्तव्य भारत भएको र त्यहाँबाट फर्केका धेरै क्वारेन्टाइनमा राखिएको छ’ उनले भनिन् । क्वारेन्टाइनमा राखिएका केही भने घर फर्किसकेका छन् ।
