अत्तरिया : नेपालमा आज बिहान देखी लक डाउन गरिएको छ । यसैबेला भारतका बिभिन्न शहरहरुवाट नेपाल आउदै गरेका नेपालीहरु सिमा नाकामा बिचल्लीमा परेका छन् ।
कैलालीको भारतसंग सिमा जोडिएको गौरीफन्टा नाका र कञ्चनपुरको गड्डाचौकी नाकावाट नेपाल भित्रिरहेका सयौ नेपाली बिचवाटोमै अलपत्र भएपछि बिचल्लीमा परेका हुन् ।
आज बिहान करिब ५ सयको संख्यामा भारतमा रहेका नेपालीहरु नेपाल प्रवेश गर्ने प्रयास गरेपछि स्थिति असहज बनेको हो।
नेपालमा लकडाउन गरिएपछि उनीहरुलाई नेपाल प्रबेश गर्न दिइएको छैन । विश्वब्यापी महामारीका रुपमा फैलिदै गएको कोरोना भाइसरको संक्रमण भारतमा पनि बढ्दै गएपछि अहिले सुदूरपश्चिम प्रदेश सहित बिभिन्न ठाउँका नागरिकहरु आ आफ्नो गाउँघर तिर फर्किरहेका छन् ।
सिमा नाकामा राति नै पुगेको भएपनि उनीहरु रातीदेखी न त पानी पाएका छन् न त खाना । सीमामा रहेका नेपालीहरुको व्यवस्थापनका लागि पहल भईरहेको जिल्ला प्रशासन कार्यालय कैलालीले जनाएका छन् ।
अहिले को कुन जिल्लाको हो सम्बन्धित जिल्लाका अधिकारीसँग समन्वय गरी फर्केने व्यवस्था गरिने भन्दै प्रहरीले माइकिङ गरी सम्झाई बुझाई गरिरहेको छ।
