काठमाण्डौ : भारतमा कोरोना भाइरसको संक्रमण भएको आशंकामा आइसोलेशनमा राखेर उपचार गरिएका एक व्यक्तिले आत्महत्या गरेका छन् ।
सफ्दरगञ्ज अस्पतालमा निगरानीमा राखिएका २३ वर्षका व्यक्तिले अस्पतालको सातौँ तलबाट हामफालेर आत्महत्या गरेको भारतीय सञ्चारमाध्यमले जनाएका छन् ।
ती युवालाई बुधवार ९ बजे अस्पताल भर्ना गरिएको थियो । त्यसपछि उनलाई आइसोलेशन वार्डमा सारिएकोमा सवा ९ बजेतिर उनले हामफालेर आत्महत्या गरेको प्रहरीले जनाएको छ । उनलाई इन्दिरा गान्धी अन्तर्राष्ट्रिय विमानस्थलबाट अस्पताल रिफर गरिएको थियो ।
टाउको दुखेको भनेपछि उनलाई विमानस्थमै परीक्षण गरिएको थियो र त्यसपछि उनलाई अस्पताल पठाइएको हो । उनी एयर इन्डियाको फ्लाइटबाट दिल्ली पुगेका थिए ।
उनी विगत एक वर्षदेखि अष्ट्रेलियाको सिड्नी बस्दै आएका थिए । बुधवार उनी पञ्जाबको नागपुरमा रहेको घर जानका लागि आएका थिए ।
