कोरोना त्रासका कारण नेपालगन्ज -रुपइडिहा सिमा नाकामा बुधबारदेखि सवारी साधनलाई रोक लगाइएको छ।
नेपालगन्जको चौलिका चोकदेखि जमुनहा नाकासम्म कुनै पनि सवारीसाधनलाई आज बिहान देखि चल्न नदिएको जिल्ला ट्राफिक प्रहरी कार्यालय बाँकेले जानकारी दिएको छ।
बिश्वमै महामारीकै रुपमा रहेको कोरोना भाइरस संक्रमण हुन नदिन नेपालगन्ज(रुपईडिहा नाकामा पुर्ण रुपमा सवारीसाधनलाई बन्द गरि पैदल यात्रुलाई मात्र आवतजावत गर्न दिइएको छ।
रुपईडिहा नाकाबाट समेत पैदल यात्रुलाई मात्र नेपालगन्ज तर्फ आउन दिइएको छ।भारतीय प्रशासनले नेपालगन्जतर्फ आउने सवारीसाधनलाई पुर्ण रुपमा रोक लगाएको छ। दुवै देशका सुरक्षा निकायले जिप, बस, ट्रक, मोटरसाइकल र साइकललाई रोक लगाएर पैदल यात्रुलाई मात्र सिमामा स्वास्थ्य जाँच गराएर आवतजावत गर्न दिएको जिल्ला ट्राफिक बाँके प्रमुख प्रहरी निरीक्षक पबिन्द्र बमले बताए।
एम्बुलेन्सलाई भने सन्चालन गर्न दिइएको छ । जमुनहा नाकामा टेण्ट लगाएर स्वास्थ्य जाँच गरिदै गरेको नेपालगन्ज उपमहानगरपालिकाका जनस्वास्थ्य निरीक्षक जागेश्वर बस्नेतले बताए।
सवारीसाधन निर्बाध रुपमा चल्दा बढी भिडभाडले स्वास्थ्य जाँच मा समेत असर पुग्ने हुँदा सबै सवारीसाधन बन्द गर्दा पैदलयात्रुलाई स्वास्थ्य जाँच गर्नमा सहयोग पुगिरहेको बस्नेतले बताए।
