मोरङ : टिपरको ठक्करबाट हजुरबुबा र नातिनीको मृत्यु भएपछि विराटनगर–विराटचोक सडक खण्डमा तनाव सिर्जना भएको छ ।
मंगलबार राति साढे ९ बजे विराटनगर– १९ मिलनचोकमा टिपरले अटोलाई ठक्कर दिँदा एकै परिवारका दुई जनाको मृत्यु भएपछि तनाव उत्पन्न भएको हो ।
विराटचोक–घिनाघाट सडकखण्डमा विराटनगरतर्फ आउँदै गरेको को १ ख २९१७ नम्बरको टिपरको ठक्करबाट ४५ वर्षीय बाबुराम सरदार र उनकी नातिनी ६ वर्षीया सविता सरदारको मृत्यु भएको थियो ।
पूर्वतर्फ जाँदै गरेको प्रदेश १–००२ ह ८६०६ नम्बरको अटोलाई टिपरले ठक्कर दिँदा अटो चालक मोरङ ग्रामथान गाउँपालिका–२ बस्ने बाबुराम र उनको नातिनी सविताको घटनास्थलमै मृत्यु भएको थियो । एकै परिवारका दुई जनाको मृत्यु भएपछि बुधबार बिहानैदेखि स्थानीयले सडक अवरुद्ध गरेका छन् ।
ठूलो संख्यामा प्रहरी र सशस्त्र प्रहरी परिचालन भएको छ ।
दुर्घटना पछि आक्रोशित बनेका स्थानीय र आफन्तले मंगलबार राति नै टिपरमा आगजनी गरेका थिए । टिपर चालक जिल्ला सुनसरी रामधुनी नगरपालिका–५ का ३३ वर्षीय हरेराम चौधरीलाई प्रहरीले नियन्त्रणमा लिएको छ । सो सडकखण्डको बिराटचौक सिसौघारीमा गतबर्ष टिपरको ठक्करबाट एक बालिकाको मृत्युपछि स्थानीयले ७ वटा टिपर जलाएका थिए ।a
