काठमाण्डौं : नेकपाको सचिवालय बैठकले उपाध्यक्ष बामदेव गौतमलाई राष्ट्रियसभाको सदस्य बनाउने निर्णय गरेको छ ।
प्रधानमन्त्री निवास बालुवाटारमा बसेको सचिवालय बैठकले गौतमलाई मन्त्रिपरिषदको सिफारिसमा राष्ट्रपतिबाट राष्ट्रियसभा सदस्य नियुक्तिका लागि निर्णय गरेको हो । अब मन्त्रिपरिषद्को सिफारिसमा राष्ट्रपतिले गौतमलाई राष्ट्रिय सभा मनोनित गर्ने छिन्।
अहिले राष्ट्रिय सभामा पदावधि सकिन लागेका १९ सदस्यमध्ये १८ जना माघ ९ गते भएको निर्वाचनमा निर्वाचित भएर आएका छन्। राष्ट्रपतिबाट मनोनित भएका अर्थमन्त्री डा. युवराज खतिवडाको ठाउँमा गौतमलाई राष्ट्रिय सभा सदस्य बनाउन लागिएको हो।
डा.खतिवडाको समयावधि फागुन २० गते सकिँदै छ। त्यसपछि गौतम राष्ट्रिय सभा सदस्य बन्नेछन्।
यस अघि उनले राष्ट्रिय सभा सदस्य बन्न सर्त राखेका थिए। राष्ट्रिय सभाबाट पनि प्रधानमन्त्री बन्ने गरि संविधान संशोधन गर्नुपर्ने सर्त राखेका थिए।
शनिबार बसेको नेकपा सचिवालय बैठकमा संविधान संशोधन गर्नेगरि सहमति जुटेपछि गौतम राष्ट्रिय सभा जान तयार भएका हुन्। तर, संविधान संशोधन विषयमा भने नेकपाभित्रै पनि विरोध भइरहेको छ।
गौतम प्रतिनिधिसभा निर्वाचनमा बर्दिया १ बाट कांग्रेसका सञ्जय गौतमसँग पराजित भएका थिए।
