काठमाडौं : पाकिस्तानले काश्मीरी जनताको आत्मनिर्णयको अधिकारको सम्मान गर्दै जनमतसङ्ग्रह गराउन संयुक्त राष्ट्रसङ्घले गरेको प्रतिबद्धता कार्यान्वयनका निम्ति अन्तरराष्ट्रिय समुदायलाई आह्वान गरेको छ ।
काश्मीर ऐक्यबद्धता दिवसका अवसरमा बुधबार काठमाडौंमा भएको अन्तरसंवाद कार्यक्रममा नेपालका लागि पाकिस्तानी राजदूत मजहर जावेदले ७० वर्षअघि राष्ट्रसङ्घीय सुरक्षा परिषद्ले पारित गरेको काश्मीरसम्बन्धी प्रस्ताव कार्यान्वयनमा विश्व समुदायले सघाउनुपर्नेमा जोड दिए ।
दक्षिण एशियाको शान्ति, स्थायित्व र विकासका लागि कश्मीर समस्या हल गर्नु अपरिहार्य भएको बताउँदै उनले बितेका ६ महिनामा त्यहाँका जनता आधारभूत सेवाबाट वञ्चित भएकाले बताए ।
उनले मानवअधिकारकर्मी, नागरिक समाज, सञ्चारकर्मीसहित अन्तरर्राष्ट्रिय समुदायको सहयोग आवश्यक भएकामा जोड दिए ।
पचास वर्षपछि राष्ट्रसङ्घको विवाद समाधान गर्ने प्रयासस्वरुप गत महिना छलफल भएको जानकारी दिँदै उनले पाकिस्तान परिणामको प्रतीक्षामा रहेको बताए ।
फरक प्रसङ्गमा नेपाल र पाकिस्तानबीच सुमधुर सम्बन्ध रहेको बताए ।
त्यसलाई अझ प्रगाढ तुल्याउन आफू दृढ रहेको बताउँदै समय–समयमा दुवै देशबाट हुने उच्चस्तरीय भ्रमणले पारस्परिक सम्बन्धलाई नवीकरण गर्न र एकअर्कालाई नजिकबाट बुझ्न सहयोग पुगेको उनको भनाइ छ ।
कार्यक्रममा नेपाल–पाकिस्तान मैत्री तथा सांस्कृतिक सङ्गठनका अध्यक्ष हिमालय शम्शेर जवरा, महासचिव मञ्जुरत्न शाक्यलगायतले वार्ता र संवादबाट समस्याको निकास खोजिनु पर्नेमा जोड दिए ।
