डोटी : जिल्ला अस्पताल डोटी सुदूरपश्चिममा रहेका जिल्ला अस्पतालमध्ये प्रदेशकै उत्कृट अस्पताल बन्न सफल भएको छ ।
नेपाल सरकारद्वारा अस्पतालहरूको न्यूनतम सेवा गुणस्तर मापदण्ड मापनमा जिल्ला अस्पताल डोटी प्रदेशभरको उत्कृट बन्न सफल भएको स्वास्थ्य निर्देशनालय राजपुरका मेडिकल अधिकृत डा भुषण मिश्रले जानकारी दिए ।
तीन सय ५० पूर्णाङ्कमा विभिन्न सूचकलाई आधार मानेर प्रदेशभरका जिल्ला अस्पताल र जिल्लास्तरका प्राथमिक अस्पताललाई नम्बर दिइएको थियो । त्यसमा डोटी अस्पतालले ७७ प्रतिशत अंक प्राप्त गरेको छ । ६ महिना अगाडि भएको गुणस्तरीय सेवा मापदण्ड फलोअपमा भने डोटी र अछाम जिल्ला अस्पताल समान ८९ दशमलब ५ प्रतिशतका साथ उत्कृष्ठ भएका थिए ।
सरकारबाट अस्पतालहरूले न्यूनतम रूपमा प्रदान गर्नुपर्ने सेवाको अवस्था, यथार्थ अवस्था र बीचको समस्या कहाँ छ भन्नेलगायतका विषयमा ६÷६ महिनामा मापन हुने गरेको छ । यही माघमा आठौँ फलोअप भएको हो । सुुशासन तथा व्यवस्थापन, उपचार सेवा र अस्पतालका सहयोगी संयन्त्र गरी मुख्य तीन सूचकमा विभिन्न उपसूचक निर्धारण गरेर अस्पतालको सेवाको गुणस्तर मापन गरिएको डा मिश्रले बताए ।
यसअघि डोटीसँगै समान स्थानमा रहेको अछाम अस्पताल ७१ प्रतिशत अंक प्राप्त गर्दै दोस्रो स्थानमा रहेको छ । त्यसैगरी बझाङले ७०, दार्चुलाले ७०, बैतडीले ६५ र बाजुराले ५५ प्रतिशत अंक प्राप्त गरेको स्वास्थ्य निर्देशनालय राजपुरले जनाएको छ ।
