एजेन्सी : अमेरिकी तल्लो सदन हाउस अफ रिप्रेजेन्टेटिभका डेमोक्रेटिक सांसदले राष्ट्रपति डोनाल्ड ट्रम्पविरुद्ध नयाँ प्रमाण प्रस्तुत गरेका छन् ।
ती प्रमाण ट्रम्पविरुद्धको महाअभियोग प्रस्तावबारे यसै हप्ता सुनुवाई हुन गइरहेको सिनेटमा पठाउने तयारी भइरहेको छ ।
हाउसका डेमोक्रेटिक सांसदले ट्रम्पका प्रमुख कानुनी सल्लाहकार तथा महान्यायाधिवक्ता रूडी गिउलियानीसँग नजिक रहेका एक व्यक्तिले लेखेका सन्देश र नोटलाई सिनेटसामु पेश गर्न लागेका हुन् ।
सन्देश र नोटमा ट्रम्पले आफ्ना राजनीतिक प्रतिद्धन्द्धीमाथि युक्रेनले छानबिन गर्नुपर्ने आशय रहेको छ । प्रमाणको रुपमा सिनेटमा पेश गर्न लागिएको एक सन्देश र हस्तलिखित नोटमा गिउलियानीका सहयोगी लेभ पार्नसले तयार पारेको बताइएको छ ।
दुबै प्रमाणमा युक्रेनका राष्ट्रपति भोलोदिमिर जेलेन्स्की र गिउलियानीबीच बैठक गराउने कुरा उल्लेख छ । साथै युक्रेनका लागि अमेरिकी राजदूत म्यारिया योभानोभिचलाई गिउलियानीले हटाउन चाहेको समेत उल्लेख छ ।
यसै साता अमेरिकी संसदको तल्तो सदन हाउस अफ रिप्रेजेन्टेटिभले ट्रम्पविरुद्धका २ वटा महाअभियोग प्रस्ताव माथिल्लो सदन सिनेटमा प्रस्तुत गर्ने तयारी गरिरहेको छ ।
गत साता राष्ट्रपति डोनाल्ड ट्रम्पविरुद्धको महाअभियोग प्रस्ताव यसै हप्तासम्म औपचारिक रुपमा सिनेटसमक्ष पेश गरिने तल्लो सदककी सभामुख नान्सी पेलेसीले बताएको थिइन् ।
अमेरिकी संसद्को तल्लो सदनबाट ट्रम्पमाथि लागेका महाअभियोगसम्बन्धी दुईवटा प्रस्ताव बहुमतसहित पारित भइसकेका छन् । तर उक्त प्रस्तावमाथि माथिल्लो सदन सिनेटमा छलफल र सुनुवाइ हुन भने बाँकी छ ।
ट्रम्पमाथि आफ्नो शक्तिको दुरुपयोग गरेको र सन् २०२० मा हुने मतदानमा पुनः निर्वाचित हुने सम्भावना बलियो बनाउनका लागि युक्रेनसँग अनुचित तरिकाले सहायता मागेको आरोप लागेको थियो ।
यदि सिनेटबाट २ तिहाई मतले दुबै प्रस्तावमध्ये एउटा मात्रै पारित भएमा ट्रम्पमाथि औपचारिक रुपमा महाअभियोग लाग्ने छ । महाअभियोग लागेपछि उनी स्वतः पदमुक्त हुनेछन् ।
तर सिनेटमा रिपब्लिकनहरुको बहुमत छ । त्यसैले सिनेटबाट समेत ट्रम्पमाथि महाअभियोग लगाउने प्रस्ताव २ तिहाईले पारित हुने संभावना निकै कम देखिन्छ । अमेरिकी सिनेटका कुल १०० सिनेटरमध्ये ५३ जना रिपब्लिकन, ४५ जना डेमोक्रेट र २ जना स्वतन्त्र सिनेटर छन् ।
महाअभियोगसम्बन्धी प्रस्ताव २ तिहाईले पारित हुन स्वतन्त्रसहित ट्रम्पको पार्टी रिपब्लिकनका २० जना सिनेटरले डेमोक्रेटिक सिनेटरलाई साथ दिनुपर्छ ।
