धनुषा : अवैध रुपमा नदीबाट गिट्टीबालुवाको उत्खनन गर्ने एक माफिया समूहले धनुषाको मिथिला नगरपालिकामा शुक्रबार बिहान एक युवकको हत्या गरेको छ ।
औरही खोलामा अवैध गिट्टीबालुवा उत्खनन विरोध गर्दै आएका २४ वर्षीय दिलीपकुमार महतोलाई नदीमै टिपरले किचेर हत्या गरेको हो ।
महतोले मिथिला नगरपालिका–५ श्रीपुरमा रहेको घरनजिकैको नदीमा भइरहेको अवैध उत्खननको विरोध गर्न पुग्दा ज्यान गुमाउनुपर्यो । उनलाई माफियाहरुले टिपरले किचेर हत्या गरे । घटनापछि धनुषा तनावग्रस्त बनेको छ ।
घटनाको अनुसन्धान भइरहेको इलाका प्रहरी कार्यालय ढल्केबरका प्रहरी निरीक्षक रामकुमार यादवले बताए। उनका अनुसार महतोलाई जबर्जस्ती समाएर ना ७ ख ६४१३ नम्बरका टिपर चालकले किचेका थिए।
साथीसँग मर्निङवाक गएका बेला महतोको हत्या भएको स्थानीयले आरोप लगाएका छन्। टिपर र चालकलाई नियन्त्रणमा लिएको इलाका प्रहरी कार्यालय ढल्केबरले जनाएको छ।युवको हत्या विरोधमा स्थानीयले टायर बालेर पूर्वपश्चिम राजमार्ग अवरुद्ध पारेका छन्। राजनीति र प्रहरीको संरक्षणमा नै देशभरी नै यस्ता समूह सक्रिय हुँदै गएका छन् ।
पछिल्लो समय स्थानीय निकायका जनप्रतिनिधि, ठेकेदार, स्थानीय गुण्डा देखि प्रशासनको मिलेमतोमा अवैध रुपमा गिट्टीबालुवा उत्खनन उत्कर्षमा पुगेको छ । यस क्षेत्रमा गुण्डाराज मौलाएर माफियाराज चल्न थालेको छ । दलीय सदस्यता लिएका गुण्डाहरु सक्रिय भएर अवैध तरिकाले प्रकृतिको निमर्म दोहन गरिरहेका छन् ।
