घोराही : दाङका मानसिक सन्तुलन गुमाएका, अलपत्र बनेका र बेसहारा भई सडकमा आएकाहरुको उद्धार थालिएको छ । निलसागर मानव सेवा आश्रम संस्थाले दाङका सडक तथा बजार क्षेत्रमा रहेका त्यस्ता व्यक्तिहरुको उद्धार गरेर आश्रममा राख्न थालेको छ ।
केन्द्रीय कार्यालय नेपालगञ्ज रहेको संस्थाले देउखुरीको सिसहनिया स्थिती पिपरि चोकमा आश्रम स्थापना गरेको छ । देउखुरी क्षेत्रबाट ९ जना व्यक्तिको उद्धार गरेको संस्थाले आज घोराही बजार क्षेत्रमा रहेका ६ जना त्यस्ता व्यक्तिहरुको उद्धार गरेको छ ।
मानसिक सन्तुलन गुमाएका, घरबाट तिरस्कृत भएका, बेसहारा भएर सडकमा आएका व्यक्तिहरुको उद्धार गरेर आश्रय दिनुका साथै उपचारको समेत व्यवस्था रहेको संस्थाका अध्यक्ष सरीता खनालले जानकारी दिएका छन । त्यस्ता व्यक्तिहरुलाई उद्धार र आश्रम सम्म पु¥याउन घोराही उपमहानगरपालिकाले समन्वय गरेको छ ।
प्रदेससभा सदस्य इन्द्रजित थारु, घोराही उपमहानगरपालिकाका प्रमुख नरुलाल चौधरी, उपप्रमुख सीता सिग्देल न्यौपाने, वडा नम्बर १४ का अध्यक्ष शक्तिराम डाँगी, १५ का अध्यक्ष रमेशकुमार पाण्डे सहित नगर प्रहरी र अन्य विभिन्न क्षेत्रका व्यक्तिहरु उद्धारमा खटिएका थिए ।
आश्रममा उपचार, मनोविमर्श, खाना, आवास, सरसफाई, योगा जस्ता कार्यहरु हुदै आएको र अहिले सम्म संस्थाले ३ सय जनालाई स्वस्थ बनाएर घरमा पूर्नमिलन गराईएको अध्यक्ष खनालले जानकारी दिएका छन ।
संस्थाले दाङ सहित कोहलपुर, नेपालगञ्ज, बार्दिया, सुर्खेत, पाल्पामा शाखा स्थापना गरेको जनाएको छ । सुरुमा सामाजिक सहयोगबाट अभियान थालेको संस्थालाई अहिले सरकारले रकम समेत उपलब्ध गराएको छ ।
बाँकेमा भवन बनाउनका लागि प्रदेश सरकारले ५ करोड बजेट विनियोजन गरेको छ भने थप व्यवस्थापनका लागि समेत बजेटको व्यबस्था गरेको सामाजिक विकास मन्त्रि सुदर्शन बरालले जानकारी दिएका छन।
