धरान : सुनसरीको बराहक्षेत्र ५ स्थित एकताटोलमा बस्ने पुर्व माओवादी कार्यकर्ताको कुखुरा फर्मबाट आइतबार अत्याधुनिक हतियार एसएमजी (सवमेसिन गन) सहित ठूलो परिमाणमा गोली र विस्फोटा पदार्थ बरामद भएको छ ।
प्रहरीले स्थानीय खेम प्रधानको कुखुरा फर्मबाट एसएमजी, गोली र विस्फोटक पदार्थ बरामद गरेको हो । प्रधानको फर्मको सिमेन्टेड गरेको सतह मुनि खाल्टो बनाएर लुकाएर राखिएको अवस्थामा हतियार र गोली बरामद गरेको प्रहरीले जनाएको छ ।
प्रहरीले एसएमजीमा प्रयोग हुने ९ हजार ९ सय ८२ थान गोली र एकबोरा विस्फोटक पदार्थ फेला पारेको जनाएको छ । प्रहरीकाअनुसार नाईन एम.एम.को एसएमजी एक थान र विभिन्न हतियारमा प्रयोगमा आउने ७ दशमलव ६२ र दशमलव ५६ एमएमका गोलीहरु बरामद भएका छन् ।
सुनसरीका एसपी यज्ञविनोद पोखरेलकाअनुसार कुखुराको खाली खोर रहेको स्थानको ढलान मुनीको जमिनबाट हतियार सहित गोली बरामद गरिएको थियो । उनले भने, ‘स–साना तीनवटा प्लाष्टिक ड्रमका भाँडामा राखी जमिन मुनि गाडिएको अवस्थामा एसएमजी एक थान र गोली ९ हजार ९ सय ८२ थान बरामद गरिएको छ । फेला पारिएको एसएमजी भने पुरै खिया लागेको अवस्थामा छ ।’
हतियार फेला परेको स्थान पूर्व माओवादी कार्यकर्ता खेम प्रधानले संचालन गरेको कुखुरा फार्म हो । प्रहरीका अनुसार हतियार फेला परेको स्थानमा कुखुराको खोर बनाउन भन्दै २०६७ सालमा ढलान गरिएको थियो । हाल खाली रहेको खोरको ढलान मुनीको जमिनमा गाडिएको अवस्थामा हतियार फेला परेको प्रहरीको भनाई छ ।
प्रधानको कुखुरा फर्ममा गोली र एसएमजी गन लुकाएर राखेको जानकारी नेपाली सेनाको टोलीले पाएपछि उक्त क्षेत्रमा खोजतलास गर्ने शिलशिलामा हतियार र गोली फेला पारिएको सुनसरी प्रहरीले जनाएको छ । बरामद हतियार र गोली नेपाली सेनाको पूर्वी पृतना सैनिक मूख्यालय इटहरीमा राखिएको सुनसरी प्रहरीले जनाएको छ ।
प्रहरीले उक्त हतियार सेना समायोजनका बेला लुकाइएको हुन सक्ने अनुमान गरेको छ ।
कुखुरा फार्म संचालक प्रधान द्धन्दकालमा माओवादीका सक्रिय कार्यकर्ता रहेका थिए । बरामद ती हतियार कस्ले र कहिले लुकाएको हो भनेर प्रहरीले यकिन गर्न नसकेपनि माओवादी समायोजनको समयमा तत्कालिन माओवादीले लुकाएको हुनसक्ने अनुमान गरिएको छ ।
