सडक खन्दा धितो राखेको खेत बेचियो

दमौली: गाउँमा मोटरबाटो खन्दा लिलाम भएको खेत अझै फिर्ता भएको छैन । ऋषिङ्पाटन बूढाकोट धारुङभज्याङ् मोटरबाटो खन्दा भिमाद–५ का लोकबहादुर थापा र नारद गैह्रेले धितो राखेको खेत साहुले लिलाम गरिदिएका थिए ।

सडक खन्दा बाँकी रहेको ७ लाख ७० हजार रुपैयाँ भुक्तानी नभएपछि भिमादबजारका साहु देवबहादुर ज्वारचनले धितो राखेको उक्त जग्गा बेचिदिएका हुन् । व्यक्तिगत लेनदेन नभई गाउँको विकासका लागि साहुँसँग आर्थिक कारोवार गरेको तर अहिले समस्यामा परिएको थापाले बताए ।

‘बाटो खन्दा एक्साभेटर प्रयोग गरेको भाडा समयसमयमा तिर्दै आएका थियौं । भाका अनुसार पूरै रकम चुक्ता गर्न सकिएन,’ उनले भने, ‘त्यही समयमा मेरो छोरा गम्भिर बिरामी भएकाले पोखरा र काठमाडौ उपचारमा व्यस्त भएँ । अदालतमा मुद्धा हालेर जग्गा लिलामी गरिएछ ।’