बागलुङमा जिप दुर्घटना : १४ को मृत्यु, १० जनाको सनाखत

बागलुङ: बडीगाड गाउँपालिका ७ भिमगिठे नजिकै यात्रुबाहक जिप खस्दा मृत्यु भएका १४ जनामध्ये १० जनाको पहिचान भएको छ । ग १ ख ४२१९ नम्बरको जिप गुल्मी ईश्माबाट बागलुङको बुर्तिवाङ हुँदै निसीखोलाको देवीस्थानतर्फ जाँदै गर्दा खोलामा खसेको प्रहरी नायव उपरीक्षक झबिन्द्रप्रसाद भट्टराईले बताए ।

जिप मंगलबार बिहान मध्यपहाडी लोकमार्गको भिमगिठे नजिकैको भीरबाट बडीगाड खोलामा खसेको हो । जिपमा १८ जना सवार थिए ।बढी भार र तीव्रगतिका कारण दुर्घटना भएको प्रहरीको प्रारम्भिक अनुमान छ ।

जिपका सवार सबै देवीस्थानमा कुलपूजामा जान लागेका थिए । घटनास्थलमा ईलाका प्रहरी कार्यालय बुर्तिवाङ, प्रहरी चौकी भिमगिठेका प्रहरी र स्थानीयले उद्धार जारी राखेका छन् ।

उद्धार गरिएकामध्ये ३ जनालाई नेपाली सेनाको हेलिकप्टरमार्फत उपचारका लागि काठमाडौं पठाइएको छ ।